اسلام آباد(پاکستان پوائنٹ نیوز05۔نومبر۔2016ء) وزیراعظم میاں محمد نواز شریف نے نویں آرمی چیف دی تقرری بارے اپنے قریبی ساتھیاں نال مشورا کرلیا اے۔ تفصیل دے مطابق آرمی چیف جنرل راحیل شریف چالو مہینے اپنے عہدے توں ریٹائر ہو جان گے، آرمی چیف جنرل راحیل شریف دے عہدے اُتے نویں آرمی چیف دی تقرری لئی وزیر اعظم میاں نواز شریف نے اپنے قریبی ساتھیاں نال مشورا شروع کیتا ہویا سی جو ہن مکمل ہو گیا اے۔
قومی اخبار وچ چھپن والی اک رپورٹ دے مطابق وزیر اعظم دے قریبی ساتھیاں نے اوہناں نوں رائے دِتی اے کہ اوہ موجودا سرحدی صورتحال، دہشت گردی خلاف جاری ضرب عضب آپریشن تے سی پیک دی تکمیل لئی ضروری اے کہ جنرل راحیل شریف دی بطور آرمی چیف ملازمت وچ توسیع کر دِتی جائے۔ جہدے بعد ہن ایہ خیال کیتا جا رہیا اے کہ وزیر اعظم اپنے قریبی ساتھیاں نال صلاح مشورا کرن گے۔
وسیلیاں دا کہنا اے کہ حکومت ولوں جنرل راحیل شریف دی ملازمت وچ توسیع دی پیشکش کیتے جان دا امکان اے، جے جنرل راحیل شریف نے ممکنا طور اُتے ملازمت وچ توسیع دی پیشکش قبول نہ کیتی تے فیر عسکری قیادت دے مشورے نال چیئرمین جوائنٹ چیف آف سٹاف کمیٹی تے چیف آف آرمی سٹاف دے عہدیاں اُتے تقرریاں کیتیاں جان گیاں۔ ایس سلسلے وچ حکمران جماعت دے اک وسیلے نے دسیا کہ وزیر اعظم نے نویں چیئرمین جوائنٹ چیفس آف سٹاف کمیٹی تے چیف آف آرمی سٹاف دیاں تقرریاں یاں آرمی چیف دی ملازمت وچ توسیع دے معاملے اُتے اہم وزیراں تے پارٹی رہنماواں دی بجائے صرف قریبی ساتھیاں نال مشورا کرن بارے سوچیا اے۔
وسیلیاں نے ایہ وی دسیا کہ نویں چیئرمین جوائنٹ چیفس آف سٹاف کمیٹی تے چیف آف آرمی سٹاف دے عہدیاں لئی پاک فوج دے 4سینیئر ترین لیفٹیننٹ جنرل زبیر محمود حیات، اشفاق ندیم احمد، جاوید اقبال رمدے تے قمر جاوید باجوہ دے ناواں اُتے غور کیتے جان دا امکان اے جدکہ اطلاع دے مطابق چیئرمین جوائنٹ چیف آف سٹاف کمیٹی دے عہدے اُتے زبیر محمود حیات یاں اشفاق ندیم نوں تعینات کیتے جان اُتے غور کیتا جاوے گا جدکہ آرمی چیف دے عہدے اُتے جاوید اقبال رمدے یاں قمر جاوید باجوہ دی تقرری ممکن اے۔ یاد رہوے کہ چیئرمین جوائنٹ چیفس آف سٹاف کمیٹی جنرل راشد محمود تے آرمی چیف جنرل راحیل شریف دی ملازمت چالو مہینے 30 تاریخ نوں ختم ہو رہی اے۔
