اسلام آباد(پاکستان پوائنٹ نیوز01۔نومبر۔2016ء) وفاقی وزیر خواجا آصف نے سپریم کورٹ دے باہر میڈیا نال گل بات کردے ہوئے آکھیا اے کہ اسیں سپریم کورٹ دی فائنڈنگ دا احترام کراں گے۔ اوہناں نے آکھیا کہ میرا ایہ مقام نہیں اے ایس لئی میں عدالتی ریمارکس اُتے تبصرا نہیں کر سکدا۔ اسیں سارے تے وزیر اعظم وی سپریم کورٹ اُتے اعتماد دا وکھالا کرن گے۔ خواجا آصف نے آکھیا کہ اسیں آن والے دو گھنٹیاں وچ اپنا موقف پیش کر دیاں گے۔
سپریم کورٹ پاناما لیکس دے معاملے اُتے کمیشن بنان یاں کوئی ہور حکم دیوے۔ اسیں سپریم کورٹ دا حکم منناں گے۔ سپریم کورٹ وی پاناما دا حل چاہندی اے۔ اوہناں نے آکھیا کہ عدالت دے ساہمنے دوویں فریقاں نال کھلوتے آں، اوہناں دا کہنا سی کہ عدالت عظمی نے واضح پیغام دِتا اے کہ ایس جھیڑے دا جلدی حل کڈھیا جائے، جدوں کمیشن کول جاواں گے تے اوہناں خلاف وی ثبوت پیش کراں گے۔
اوہناں دا کہنا سی کہ عدالت وچ ایہناں دیاں وی آف شور کمپنیاں ساہمنے آن گیاں۔ خواجا آصف نے آکھیا کہ قوم نوں احتجاجی سیاست توں نجات دیو۔ معاملا کورٹ وچ آن دے بعد احتجاج دا کوئی جوازنہیں بندا۔ اوہناں نے آکھیا کہ سانوں آئینی اداریاں اُتے پورا ایمان و اعتماد اے۔ پاناما معاملے اُتے سارے ڈرائی کلین ہو کے نکلن گے۔ کوئی داغ دھبا لے کے نہیں نکلے گا۔
