اسلام آباد(پاکستان پوائنٹ نیوز14۔دسمبر۔2018ء) سابق وزیر اعظم و پیپلز پارٹی دے رہنما راجا پرویز اشرف دا آکھنا سی کہ مراد سعید نوجوان سیاستدان نیں تے بہت ذہین بندے نیں۔ میں مراد سعید دیاں جو گلاں سُنیاں نیں اوہدے توں مینوں اوہناں دا جذبہ وی چنگا لگا اے پر میں سمجھنا واں کہ تجربہ بڑی شے اے۔ زندگی وچ تُسیں جو چیز تجربے نال سکھدے او اوہ اُنج نہیں سکھدے۔
اوہناں دا آکھنا سی کہ مراد سعید نے اسمبلی دے فلور اُتے اینا وڈا دعوا کر دتا کہ میرے کولوں 7لوک این آر او منگ رہے نیں تے ہن اپوزیشن وی اوہناں کولوں سوال کر رہی اے۔راجا پرویز اشرف دا آکھنا سی کہ جے مراد سعید کول واقعی معلومات نیں تے فیر اوہناں دی ذمے واری اے کہ اوہ این آر او منگن والیاں دے ناں دسن تے اوہناں نوں ایہ ثابت کرنا پئے گا۔ راجا پرویز اشرف دا آکھنا سی کہ جیہڑے لوکاں اُتے الزام لگے نیں اوہناں نوں فیر جواب دینا چاہیدا۔
یاد رہوے کہ چالو ہفتے قومی اسمبلی دے اجلاس وچ گل بات کردے ہوئے وزیر مملکت برائے مواصلات مراد سعید دا آکھنا سی کہ اسیں آس کر رہے ساں کہ اج ایوان وچ عوامی مسائل بارے گل بات کیتی جائے گی۔ کیہ اپوزیشن لیڈر اُتے کیس ساڈے دور وچ بنے سن؟کیہ صاف پانی ،ملتان میٹرو تے ہور کیس سکینڈل نہیں؟مراد سعید نے آکھیا کہ ایوان دی رائے اے جیہنے وی لوکائی دا پیسہ لُٹیا اوہدی جائیداد ڈی چوک اُتے نیلام کیتی جائے۔
ماضی وچ ٹرمپ دی گل اُتے حکمران چُپ ہو جاندے سن پر عمران خان نے ٹرمپ نوں جواب دتا۔ اوہناں دا اپوزیشن نوں مخاطب کردے ہوئے آکھنا سی کہ جے تُسیں حلال کمائی کیتی اے تے ثبوت دیو تے گل ختم ہو جائے گی۔ مراد سعید نے دعوا کردے ہوئے آکھیا کہ پاکستان مسلم لیگ (ن) دے 7رہنماواں نے میرے کولوں این آر او منگیا اے پر ہن این آر او نہیں بلکہ کیس چلن گے۔ مراد سعید نے آکھیا کہ جو پہلا بندہ میرے کول این آر او منگن لئی آیا اوہ ہن وی ایس ایوان وچ موجود اے۔
اوہناں نے آکھیا کہ لوڑ ہوئی تے میں این آر او لین والے دا ناں وی دس دیواں گا۔ایس توں وکھ اجلاس دوران سابق وزیر اعظم شاہد خاقان عباسی ولوں قومی اسمبلی وچ خواجا سعدرفیق دے پروڈکشن آرڈر جاری کرن اُتے گل ختم کیتی گئی تے ایہدے مگروں وفاقی وزیر اطلاعات و نشریات فواد چودھری اپوزیشن ارکان دے سوالاں دا جواب دین لئی کھڑے ہوئے تے تقریر دے شروع وچ ای مسلم لیگ (ن) دے ارکان نوں تنقید دا نشانہ بناندے ہوئے آکھیا کہ ایہناں دی تربیت وچ کمی اے، جیہدے اُتے اپوزیشن ڈائس توں ’ڈبو لوٹا“تے ”مشرف دا یار“ دے نعرے لائے گئے۔ ایس موقعے اُتے فواد چودھری وی ہسدے ہوئے آکھن لگے کہ ٹھیک اے تہاڈی حاضری لگ گئی ۔
