لاہور(پاکستان پوائنٹ نیوز14۔دسمبر۔2018ء) حکومت نوں بنے کوئی تن مہینے ای لنگھ گئے نیں۔ وزیر اعلا پنجاب عثمان بزدار نے پچھلے دیہاڑے پہلی وار پریس کانفرنس کیتی۔ عثمان بزدار پہلی پریس کانفرنس وچ کاغذاں دا ڈھیر چُک کے وی لیائے۔ میڈیا رپورٹس وچ دسیا گیا اے کہ تن مہینے لنگھن مگروں عثمان بزدار نے پریس کانفرنس تے کیتی پر سوال کُجھ کیتا جاندا رہیا تے اوہ جواب کُجھ ہور دیندے رہے۔
وزیر اعلا پنجاب دی تیاری ادھوری لگ رہی سی کیونکہ اوہناں ہتھاں وچ کاغذ چُکے ہوئے سن۔غیر قانونی ہاؤسنگ سوسائٹی بارے سوال کیتا گیا تے کاغذ تُھلدے رہے ۔ وزیر اعلا دی بے بسی اُتے اوہناں دے ترجمان سعد رسول نے اوہناں دی بہت مدد کیتی۔ سرکاری زمیناں دے کیساں دا دسن لگے تے بہت اگے چلے گئے ، فیر ترجمان نے لقمہ دتا۔ پریس کانفرنس ختم ہوئی تے عثمان بزدار نے سُکھ دا ساہ لیا پر متھے اُتے آیا پسینہ دس رہیا سی کہ اوہ کافی بے چین جہے لگ رہے نیں۔
پر عثمان بزدار دے اک جواب نے ساریاں نوں چُپ کروا دتا۔ پرچا کار ولوں جدوں پنجاب وچ افسراں دی تبدیلی بارے سوال کیتا گیا تے اوہناں نے آکھیا کہ پہلے تُسیں آکھدے سی کہ میرے کول اختیار نہیں نیں ہن تُسیں میرے کولوں پُچھدے او کہ ایہ تُسیں کیتا؟پہلے اپنے آپ نوں کلیئر کرو۔ وزیر اعلا پنجاب نے اُردو زبان دے نال نال پنجابی زبان وی بولی۔
