حکومتی وزیراں دی شامت آ گئی، وزیر اعظم عمران خان نے وڈا حکم جاری کر دتا

سارے وزیراں نوں دفتر جاناچاہیدا، روز جانا چاہیدا تے شام تیکر اوتھے بِہنا چاہیدا، مینوں کوئی نہ آکھے کہ میری وزارت لے لی اے، اسیں مافیا خلاف کھلو گئے آں:پشاور وچ تقریب نال خطاب

حکومتی وزیراں دی شامت آ گئی، وزیر اعظم عمران خان نے وڈا حکم جاری کر دتا
سارے وزیراں نوں دفتر جاناچاہیدا، روز جانا چاہیدا تے شام تیکر اوتھے بِہنا چاہیدا، مینوں کوئی نہ آکھے کہ میری وزارت لے لی اے، اسیں مافیا خلاف کھلو گئے آں:پشاور وچ تقریب نال خطاب

پشاور(پاکستان پوائنٹ نیوز14۔دسمبر۔2018ء) وزیر اعظم عمران خان نے وزیراں نوں ہدایت کیتی اے کہ سارے وزیراں نوں دفتر جاناچاہیدا، روز جانا چاہیدا تے شام تیکر اوتھے بِہنا چاہیدا، مینوں کوئی نہ آکھے کہ میری وزارت لے لی اے۔ اوہناں نے اج پشاور وچ تقریب نال خطاب کردے ہوئے آکھیا کہ کے پی کے والے دوجی واری نہیں دیندے پر سانوں دوجی وار دتی۔ الیکشن وچ دھاندلی خلاف اسیں ہر حلقہ کھولن نوں تیار آں۔

پچھلی حکومت نے ارباں رُپئے دے فنڈز الیکشن وچ خرچ کیتے۔ اسیں ایس لئی کے پی کے وچ جِتے کہ لوکاں دی زندگی خشحال کیتی۔ لوکاں نے سمجھیا کہ اسیں وعدے نہیں کیتے پر کوشش کیتی ۔ اوہناں نے آکھیا کہ محمود خان اک سادہ تے سچا انسان اے۔ مینوں اوہناں دی ایمانداری اُتے پورا بھروسہ اے۔ جے کوئی بندہ جِنا وی عقلمند ہوئے پر جے اوہ ایماندار تے دیانتدار نہیں تے اوہدا کوئی فائدہ نہیں۔

اوہناں د اآکھنا سی کہ پنجاب دے لوکاں نے عثمان بزدار دا مذاق اُڈایا۔ پنجاب دے لوکاں نوں اجیہے وزیر اعلا دی عادت سی جو گڈیاں دے پروٹوکول اُتے 35کروڑ خرچ کر دیندا سی۔ پر ایتھے اک سادہ تے دلیر وزیر اعلا اے۔ اسیں مافیا خلاف کھلو گئے آں۔ ایس طرحاں ایہ دوویں وزیر اعلا کسے دے دباء وچ نہیں آن گے۔ مینوں خشی ہوئی جدوں محمود خان نے شیلٹر ہوم وکھایا جو اوہناں نے غریباں لئی بنایا اے۔ اوہناں نے غریباں لئی ناں ’مہمان خانہ‘ رکھیا اے۔