اسلام آباد(پاکستان پوائنٹ نیوز14۔دسمبر۔2018ء) الیکٹرانک ڈیوائسز خاص کر مہنگے موبائل فونز دی سمگلنگ نوں روکن لئی حکومت نے اوورسیز پاکستانیاں دے موبائل فونز اُتے ڈیوٹی ٹیکس لادتا اے جیہدے مگروں حکومت نوں تنقید دا وی نشانہ بنایا جا رہیا اے۔ پر ہن سوشل میڈیا ورتیندڑاں نے حکومت نوں اک زبردست صلاح دتی اے جیہدے نال قومی ائر لائن پی آئی اے نوں کئی گنا فائدہ ہو سکدا اے۔
سوشل میڈیا ورتیندڑاں نے حکومت نوں تجویز دتی اے کہ جے حکومت پی آئی اے راہیں سفر کر کے آن والے شہریاں نوں دو موبائل فون لیان دی اجازت دے دیوے تے ایہدے اُتے کوئی ٹیکس نہ لایا جائے تے ایس طرحاں نہ صرف مسافر پی آئی اے وچ سفر کرن نوں ترجیح دین گے بلکہ قومی ائر لائن دے ریونیو وچ وی وادھا ہوئے گا۔ورتیندڑاں دا آکھنا اے کہ جے حکومت ایہ اعلا ن کر دیوے کہ پی آئی اے راہیں پاکستان آن والے مسافراں نوں دو موبائل فونز لیان دی اجازت ہوئے گی تے اوہناں کولوں کوئی ڈیوٹی ٹیکس نہیں لیا جائے گا تے ایس صورت وچ پی آئی اے بہت ترقی کرے گا جدکہ مسافر وی ڈیوٹی ٹیکس دین توں بچ جان گے تے اپنے ہزاراں رُپئے بچان لئی پی آئی اے راہیں سفر کرن نوں ای ترجیح دین گے۔
