لاہور(پاکستان پوائنٹ نیوز13۔دسمبر۔2018ء) تحریک انصاف نے (ن) لیگ دی سیٹ کھوہ لئی،اسد کھوکھر نے (ن) لیگ دے رانا خالد نوں ہرا دتا۔ تفصیل دے مطابق پی پی 168لاہور دے ضمنی الیکشن وچ پولنگ ختم ہون مگروں ملن والے سارے پولنگ سٹیشناں دے غیر سرکاری غیر حتمی نتیجے دے مطابق تحریک انصاف دے اسد کھوکھر کامیاب ہوئے نیں۔ پنجاب اسمبلی دی خالی سیٹ پی پی 168لاہور لئی کل 11امیدوار میدان وچ سن پر اصل مقابلا پی ٹی آئی دے ملک اسد علی کھوکھر تے مسلم لیگ (ن) دے امیدوار رانا خالد محمود قادری وچکار سی جدکہ پیپلز پارٹی نے ایس سیٹ اُتے مسلم لیگ (ن) دی حمایت دا اعلان کیتا سی۔
پر ہن تیکردے سارے پولنگ سٹیشناں دے نتیجے مطابق پی ٹی آئی دے ملک اسد کھوکھر 17485ووٹ لے پہلے جدوں کہ مسلم لیگ (ن) دے امیدوار رانا خالد 16757ووٹ لے دوجے نمبر اُتے رہے۔ یاد رہوے کہ عام انتخابات 2018وچ پی پی 168لاہور توں خواجا سعد رفیق نے تحریک انصاف دے امیدوار محمد فیاض بھٹی نوں ہرایا سی۔ پر بعدوں خواجا سعد رفیق نے ضمنی الیکشن دوران قومی اسمبلی دی سیٹ جِتن مگروں پی پی 168دی صوبائی اسمبلی دی سیٹ چھڈ دتی سی۔
