ساڈا مقصد پاکستانی لوکائی دی خشحالی اے:آرمی چیف

ساڈا مقصد پاکستانی لوکائی دی خشحالی اے:آرمی چیف

راولپنڈی(پاکستان پوائنٹ نیوز13۔دسمبر۔2018ء) چیف آف آرمی سٹاف جنرل قمر جاوید باجوہ نے آکھیا اے کہ امن و استحکام لئی سارے اداریاں دی حمایت جاری رکھاں گے، ساڈا مقصد پاکستانی لوکائی دی خشحالی اے، افغانستان امن دے قیام لئی سارے فریقاں دی حمایت کیتی جائے گی۔ پاک فوج دے شعبہ تعلقات عامہ(آئی ایس پی آر) دے مطابق پاک فوج دے سپہ سالار جنرل قمر جاوید باجوہ دی صدارت ہیٹھ جی ایچ کیو وچ 216ویں کور کمانڈرز کانفرنس ہوئی۔

کانفرنس وچ ایل او سی، علاقائی سکیورٹی تے مشرقی و مغربی سرحداں دی صورتحال دا جائزہ لیا گیا۔ کور کمانڈرز کانفرنس وچ خطے وچ امن و استحکام لئی دہشت گردی دے خاتمے بارے وی غور کیتاگیا۔ایس توں وکھ دہشت گردی دے ناسور نوں جڑھوں پٹن دی اہمیت بارے وی زور دتا گیا۔ کانفرنس دے رلتیاں نے قرار دتا کہ دہشت گردں نوں جڑھوں پٹن لئی علاقائی تعاون ضروری اے۔

کور کمانڈرز کانفرنس دے رلتیاں نے افغانستان وچ امن دے قیام لئی سارے فریقاں دی حمایت اُتے اتفاق دا اظہار کیتا۔ رلتیاں نے افغانستان وچ مصالحتی عمل دی کامیابی دی آس دا وی اظہار کیتا۔ آرمی چیف جنرل قمر جاوید باجوہ نے آکھیا کہ سارے بیرونی خطریاں دا مونہ توڑ جواب دتا جائے گا۔ اوہناں نے آکھیا کہ ساڈا مقصد پاکستانی لوکائی دی خشحالی اے۔ افغانستان امن دے قیام لئی سارے فریقاں دی حمایت کیتی جائے گی۔