اسلام آباد(پاکستان پوائنٹ نیوز13۔دسمبر۔2018ء) سپریم کورٹ وچ باہرلے ملک اکاؤنٹس تے جائیداداں بارے کیس دی سنوائی ہوئی۔ چیف جسٹس میاں ثاقب نثار دی سربراہی وچ تن رکنی بنچ نے آپ نوٹس کیس دی سنوائی کیتی۔ سنوائی دوران چیف جسٹس نے پُچھیا کہ علیمہ خان کدھر نیں؟کیہ اوہ عدالت وچ موجود نیں؟جیہدے مگروں علیمہ خان روسٹرم اُتے آ گئیاں۔ چیف جسٹس نے علیمہ خان کوکوں پُچھیا کہ دبئی وچ کِنے دی جائیداد مُل لئی؟علیمہ خان نے جواب دتا کہ دبئی وچ 3لکھ75ہزار ڈالر دی جائیداد لئی۔
علیمہ خان دا عدالت وچ آکھنا سی کہ 50فیصد اپنی رقم تے 50فیصد بنک کولوں قرضہ لے کے جائیداد مُل لئی۔2008وچ خریدیاں گئیاں جائیداداں نوں پچھلے سال ویچیا گیا۔ پاکستانی پونے تن کروڑ رُپئے دی جائیداد خریدی گئی سی۔ سنوائی دوران وکیل سلمان اکرام راجا نے عدالت نوں دسیا کہ علیمہ خان نے دبئی وچ 2008وچ جائیداد خریدی۔ جائیداد دے پیسے بینکنگ چینل راہیں دبئی گھلے گئے۔
ایس موقعے اُتے ایف بی آر حکام نے عدالت نوں دسیا کہ علیمہ خان نے دبئی وچ جائیداد خریدی۔ جائیداد دی 50فیصد رقم علیمہ خان نے دتی۔ سپریم کورٹ نے ایس موقعے اُتے علیمہ خان نوں 29.4ملین رُپئے جمع کروان دا حکم دتا۔ عدالت نے حکم دتا کہ علیمہ خان 29.4ملین رُپئے ایف بی آر وچ جمع کروان۔ عدالت نے ایہ وی آکھیا کہ ذکر کیتے گئے پیسے جمع نہ کروان اُتے جائیداد ضبط کر لی جائے گی۔عدالت نے آکھیا کہ علیمہ خان چاہن تے ایف بی آر خلاف قانونی کارروائی کر سکدی نیں پر ایس توں پہاں اوہناں نوں ذکر کیتی گئی رقم جمع کروانی پئے گی۔
