اسلام آباد(پاکستان پوائنٹ نیوز12۔دسمبر۔2018ء) لیگی ارکان ولوں فواد چودھری خلاف ”ڈبو لوٹا“ تے” مشرف کا یار“ دے نعرے۔تفصیل دے مطابق قومی اسمبلی دے اج ہون والے اجلاس وچ سابق وزیر اعظم شاہد خاقان عباسی ولوں قومی اسمبلی وچ خواجا سعدرفیق دے پروڈکشن آرڈر جاری کرن اُتے گل ختم کیتی گئی تے ایہدے مگروں وفاقی وزیر اطلاعات و نشریات فواد چودھری اپوزیشن ارکان دے سوالاں دا جواب دین لئی کھڑے ہوئے تے تقریر دے شروع وچ ای مسلم لیگ (ن) دے ارکان نوں تنقید دا نشانہ بناندے ہوئے آکھیا کہ ایہناں دی تربیت وچ کمی اے، جیہدے اُتے اپوزیشن ڈائس توں ’ڈبو لوٹا“تے ”مشرف دا یار“ دے نعرے لائے گئے۔
ایس موقعے اُتے فواد چودھری وی ہسدے ہوئے آکھن لگے کہ ٹھیک اے تہاڈی حاضری لگ گئی ۔ایس توں وکھ اجلاس دوران گل بات کردے ہوئے وزیر مملکت برائے مواصلات مراد سعید دا آکھنا سی کہ اسیں آس کر رہے ساں کہ اج ایوان وچ عوامی مسائل بارے گل بات کیتی جائے گی۔ کیہ اپوزیشن لیڈر اُتے کیس ساڈے دور وچ بنے سن؟کیہ صاف پانی ،ملتان میٹرو تے ہور کیس سکینڈل نہیں؟مراد سعید نے آکھیا کہ ایوان دی رائے اے جیہنے وی لوکائی دا پیسہ لُٹیا اوہدی جائیداد ڈی چوک اُتے نیلام کیتی جائے۔
ماضی وچ ٹرمپ دی گل اُتے حکمران چُپ ہو جاندے سن پر عمران خان نے ٹرمپ نوں جواب دتا۔ اوہناں دا اپوزیشن نوں مخاطب کردے ہوئے آکھنا سی کہ جے تُسیں حلال کمائی کیتی اے تے ثبوت دیو تے گل ختم ہو جائے گی۔ مراد سعید نے دعوا کردے ہوئے آکھیا کہ پاکستان مسلم لیگ (ن) دے 7رہنماواں نے میرے کولوں این آر او منگیا اے پر ہن این آر او نہیں بلکہ کیس چلن گے۔ مراد سعید نے آکھیا کہ جو پہلا بندہ میرے کول این آر او منگن لئی آیا اوہ ہن وی ایس ایوان وچ موجود اے۔ اوہناں نے آکھیا کہ لوڑ ہوئی تے میں این آر او لین والے دا ناں وی دس دیواں گا۔
