اسلام آباد(پاکستان پوائنٹ نیوز12۔دسمبر۔2018ء) وزیر اعظم عمران خان نے وزیراں دی کارکردگی داجائزہ لین لئی وفاقی کابینہ دا اک ہور اجلاس سد لیا۔ اجلاس وچ باقی رہ جان والیاں 6وزارتاں دی کارکردگی دا جائزہ لیا جائے گا۔ پہلے مرحلے وچ 26وزارتاں دی کارکردگی دا جائزہ لیا گیا سی۔ میڈیا رپورٹس وچ دسیاگیا اے کہ وزیر اعظم نے وزیراں دی کارکردگی داجائزہ لین لئی وفاقی کابینہ دااک ہور اجلاس ہفتے نوں وزیر اعظم ہاؤس وچ سدیا اے۔
اجلاس وچ باقی رہ جان والیاں 6وزارتاں دی کارکردگی دا جائزہ لیا جائے گا۔ پہلے مرحلے وچ 26وزارتاں دی کارکردگی دا جائزہ لیا گیا سی۔ یاد رہوے پیر دے دیہاڑے وزیر اعظم عمران خان دی صدارت ہیٹھ ہون والے اجلاس وچ وزیراں دی 100دناں دی کارکردگی دا جائزہ لیا گیا۔ وزیر اعظم نے کابینہ دے اجلاس لئی سارا دن رکھیا۔ وفاقی کابینہ دے اجلاس مگروں جاری کیتے گئے اعلامیے دے مطابق اجلاس وچ سارے وزیراں دی کارکردگی دا جائزہ لیا گیا۔
وزیر اعظم نے وزیراں دی کارکردگی دا جائزہ لین لئی ہر 3مہینے بعد اجلاس سدن دا فیصلا کیتا۔ اعلامیے وچ ہور لکھیا گیا کہ وزیراں نوں ہور ٹاسک دین دا فیصلا وی کیتا گیا ۔ کارکردگی دا جائزہ لین دا مقصد شہریاں دی زندگی بہتر بنانا اے۔ اعلامیے دے مطابق سارے وزیراں نال کفایت شعاری مہم، اقدامات تے آؤندے پلان بارے وی گل بات کیتی گئی۔ وزیراں دی کارکردگی ہور بہتر بنان لئی اقدامات بارے وی پُچھیا گیا۔
وزیراعظم عمران خان نے وزیراں نوں سٹرٹیجک پلان تیار کرن دی ہدایت کیتی۔ وزیر اعظم دی ہدایت اُتے پلان پنج سال لئی بنایا جائے گا۔ وزیر اعظم نے ہر وزیر کولوں تن سوال کیتے کہ وزارت و چ ہن تیکر کیہڑے کیہڑے منصوبے شروع کیتے گئے ؟ دوجا سوال پُچھیا گیا کہ بطور وزیر آن والے ویلے وچ کیہ کرن والے او؟جدکہ تیجا سوال پُچھیا گیا کہ بطور وزیر خرچیاں وچ کِنی کمی کیتی۔
