اسلام آباد(پاکستان پوائنٹ نیوز12۔دسمبر۔2018ء) چرس توں پابندی ہٹائی جائے تاں جے ساڈے پٹھان بھرا وی خش ہوجان۔مشہور پرچاکار و تجزیہ نگار اوریا مقبول جان دا آکھنا اے کہ مذہب توں ہٹ کے گل کرئیے تے شراب پوری دنیا دا مسئلا اے تے دنیا بھر وچ نفسیاتی تے جسمانی روگاں دی وجہ شراب اے۔ اوہناں دا آکھنا سی کہ میں پڑھیا سی کہ روس اندر لوک پاگل ہو گئے سن تے آکھیا کہ اسیں شراب نوں بند کرنا اے۔
شراب پی کے گڈی چلان اُتے لائسنس وی معطل ہو جاندا اے۔ 1945تیکر امریکا وچ شراب اُتے پابندی لگ گئی سی تے دنیا دا کوئی مذہب وی شراب پین دی اجازت نہیں دیندا۔ اوریا مقبول جان نے ہور آکھیا کہ تحریک انصاف دا ادھا دھڑ کُجھ ہور آکھدا اے جدکہ دوجا دھڑ کُجھ ہور آکھدا اے کیونکہ پیپلز پارٹی تے (ن) لیگ تے کُھل کے آکھدی اے کہ اسیں شراب دے حامی آں پر کیہ عمران خان ریاست مدینہ وچ شراب حلال کروان گے۔
یاد رہوے کہ حکمران جماعت دے رکن اسمبلی رامیش کمار ولوں شراب دے اجازت نامے منسوخ کرن دا بل قومی اسمبلی وچ پیش کیتاگیا۔ ایس بارے گل بات کردے ہوئے وفاقی وزیر اطلاعات دا آکھنا سی کہ رامیش کمار نے سستی شہرت لئی شراب بارے قرارداد لیان دی کوشش کیتی۔ فواد چودھری نے آکھیا کہ ایس کم وچ قانون بارے کُجھ نہیں اے جیہنے شراب پینی اے اوہ پیندا رہوے گا۔پر اوریا مقبول جان نے ایس بیان اُتے فواد چودھری نوں تنقید دا نشانہ بناندے ہوئے آکھیا کہ ایس طرحاں تے جیہنے ہیروئن پینی اے اوہ پیندا رہوے گا کیونکہ اوہنوں مل جائے گی تے جیہنے شراب پینی اے اوہ وی مل جائے گی تے فیر چر س اُتے پابندی وی چُک لینی چاہیدی تاں جے ساڈے پٹھان بھرا وی خش ہو جان۔
