اسلام آباد(پاکستان پوائنٹ نیوز11۔دسمبر۔2018ء) امریکا نے اقلیتاں نال مندے سلوک دا بہانہ کردے ہوئے پاکستان نوں بلیک لسٹ وچ شامل کر دتا۔ تفصیل دے مطابق چالو ورھے مئی وچ عالمی مذہبی آزادی رپورٹ 2017جاری کیتی گئی۔مذہبی آزادی اُتے امریکا دے خصوصی سفیر سیموئیل برون بیک نے پریس کانفرنس کردے ہوئے آکھیا کہ بھارت وچ وی کئی مذہباں نوں آزادی حاصل نہیں اے۔
امریکا بھارت نوں واچ لسٹ وچ نہیں پا رہیا۔ وزیر خارجا مائیک پوپیو نے آکھیا کہ ایہ رپورٹ دنیا بھر وچ مذہبی آزادی دی حمایت وچ امریکی تاریخ کردار دا اک بیان اے۔ مذہبی آزادی دا امریکا دے مڈھ وچ کردار سی تے ایہ ساڈے آن والے کل لئی وی بہت اہم اے۔ ایہ دنیا بھر دے ہر شہری دا حق اے۔ صدر ٹرمپ تے نائب صدر مذہبی آزادی دے خاہشمند بندیاں دے نال نیں۔
اوہناں دا آکھنا سی کہ ایہ رپورٹ امریکی تے عالمی اقدار دے تحفظ لئی امریکی سفارتکاراں دی محنت دا نتیجہ اے۔ ایہ رپورٹ 200ملکاں وچ حکومتاں، دہشت گرد گروپاں تے انفرادی بندیاں ولوں مذہبی آزادی نوں پامال کرن تے ایس مسئلے دے حل دا احاطہ کردی اے۔ پر ہن تازہ اطلاع دے مطابق پاکستان دا ناں واچ لسٹ وچوں کڈھ کے بلیک لسٹ وچ شامل کر دتا گیا اے۔امریکا نے ایہ کم پاکستان وچ مذہبی آزادی وچ آن والیاں اوکڑاں نوں مُکھ رکھدے ہوئے کیتا اے۔
