سری نگر(پاکستان پوائنٹ نیوز11۔دسمبر۔2018ء) بالی ووڈ فلم حیدر وچ کم کرن والے نوجوان ثاقب بلال نوں بھارتی فوج نے شہید کر دتا۔ ثاقب بلال تے مدثر رشید دی نمازہ جنازہ وچ ہزاراں دی گنتی وچ کشمیریاں نے رلت کیتی۔ تفصیل دے مطابق کشمیری نوجوان ثاقب بلال نے بالی ووڈ فلم حیدر وچ کم کرکے شہرت پائی۔ فلم حیدر مشہور فلمساز وشال بھردواج دا شاہکار سی جو 2014وچ ریلیز ہوئی۔
ایس فلم وچ شاہد کپور نے مرکزی کردار ادا کیتا سی۔ثاقب بلال نوں بھارتی فوجیاں ولوں تشدد دا نشانہ بنایا گیا اے۔ ثاقب بلال تے مدثر رشید نوں بھارت مخالف نعرے لان اُتے شہید کیتا گیا۔ ثاقب بلال فٹ بال کھیڈن دا شوقین سی تے کئی وار ہاجنز عیدہ گاہ وچ فٹ بال کھیڈن جاندا سی۔ دوناں نوجواناں دی شہادت مگروں اوہناں دا جنازہ وی اوسے فٹ بال گراؤنڈ وچ پڑھیا گیا، جیہدے وچ ہزاراں دی گنتی وچ لوک رلتی ہوئے۔
ثاقب بلال فٹبال کھیڈن دے نال نال بہت ذہین پڑھیار سی ۔ اوہنے میٹرک وچ چنگے نمبر لئے سن جدکہ اوہ اپنے علاقے وچ فلم وچ اداکاری کرن دے حوالے نال مشہور سی۔دوجے پاسے شہید ہون والے نوجوان دا تعلق اک غریب گھرانے توں سی جو محنت مزدوری کر کے اپنے گھر والیاں دا ڈھڈ بھرن دے نال نال پڑھائی وی کر رہیا سی۔
