اسلام آباد(پاکستان پوائنٹ نیوز11۔دسمبر۔2018ء) وفاقی حکومت نے سارے سرکاری ملازماں دا ڈیٹا اکٹھا کرن دا فیصلا کرلیا اے جدکہ اسٹیبلشمنٹ ڈویژن نے گریڈ1توں22تیکردے وفاقی ملازماں دیاں اہم تفصیلاں منگ لئیاں نیں۔ تفصیل دے مطابق وفاقی حکومت نے سرکاری ملازماں دا سارا ڈیٹا اکٹھا کرن دا فیصلا کرلیا اے۔ ایس سلسلے وچ گریڈ اک توں 22دے سارے سرکاری ملازماں کولوں اوہناں دیاں تفصیلاں منگیاں جان گیاں۔
سرکاری ملازماں کولوں تفصیلاں منگن لئی دو صفحیاں اُتے مشتمل اک فارم جاری کیتا گیا اے۔ ایس فارم راہیں ملازماں نوں ذاتی تے پیشے دے حساب نال تفصیلاں جمع کروان دی ہدایت کیتی گئی اے۔فارم وچ سرکاری ملازماں دا ناں، ولدیت، شناختی کارڈ نمبر، دوہری شہریت،جنس، بلڈ گروپ، پاسپورٹ،فون نمبر، ویاہ بارے تفصیلاں، بیوی دی دوہری شہریت تے بالاں دیاں تفصیلاں وی منگیاں گئیاں نیں۔
ایس توں وکھ مذہب، گڈی، موٹر سائیکل، معذور ہون یاں نہ ہون دی تفصیل، عہدہ، سکیل، سرکاری ملازمت شروع کرن دی تاریخ، سروس گروپ، تعیناتی دی تھاں، صوبے دا ناں تے تعلیمی قابلیت دیاں تفصیلاں منگیاں گئیاں نیں۔ ایس توں وکھ وفاقی حکومت ولوں جاری فارم وچ ملازماں کولوں پچھلے تن سال وچ حاصل ٹریننگ، رہائش تے پہلی جولائی 2018تیکر دی پوزیشن دیاں تفصیلاں وی منگیاں گئیاں نیں۔
