وفاقی کابینہ دا اجلاس ساڈھے گیارھاں شروع ہویاپر وزیراعظم کدوں آئے؟مثال قائم کر دتی

اجلاس باقاعدہ تے ساڈھے گیارھاں وجے شروع ہویا پر عمران خان دو گھنٹے پہلاں ای بیٹھے سن:عامر متین

وفاقی کابینہ دا اجلاس ساڈھے گیارھاں شروع ہویاپر وزیراعظم کدوں آئے؟مثال قائم کر دتی
 اجلاس باقاعدہ تے ساڈھے گیارھاں وجے شروع ہویا پر عمران خان دو گھنٹے پہلاں ای بیٹھے سن:عامر متین

اسلام آباد(پاکستان پوائنٹ نیوز11۔دسمبر۔2018ء) پچھلے دیہاڑے وفاقی کابینہ دا اک لما اجلاس ہویا ۔ ایس حوالے نال گل بات کردے ہوئے مشہور پرچاکار عامر متین دا آکھنا سی کہ وفاقی کابینہ دا اجلاس بغیر کسے ایمرجنسی دے کئی گھنٹیاں تیکر جاری رہیا۔ انج بہت گھٹ ہوندا اے کہ بغیر کسے ایمرجنسی دے وفاقی کابینہ دے اینے لمے اجلاس ہون۔ عامر متین دا ہور آکھنا سی کہ اجلاس باقاعدہ تے ساڈھے گیارھاں وجے شروع ہویا پر عمران خان دو گھنٹے پہلاں ای بیٹھے سن تے فیر واری واری حساب دو پیارے بالاں والا سلسلا شروع ہویا۔

یاد رہوے کہ پچھلے دیہاڑے وزیر اعظم عمران خان دی صدارت ہیٹھ ہون والے اجلاس وچ وزیراں دی 100دناں دی کارکردگی دا جائزہ لیا گیا۔ وزیر اعظم نے کابینہ دے اجلاس لئی سارا دن رکھیا۔ وفاقی کابینہ دے اجلاس مگروں جاری کیتے گئے اعلامیے دے مطابق اجلاس وچ سارے وزیراں دی کارکردگی دا جائزہ لیا گیا۔ وزیر اعظم نے وزیراں دی کارکردگی دا جائزہ لین لئی ہر 3مہینے بعد اجلاس سدن دا فیصلا کیتا۔

اعلامیے وچ ہور لکھیا گیا کہ وزیراں نوں ہور ٹاسک دین دا فیصلا وی کیتا گیا ۔ کارکردگی دا جائزہ لین دا مقصد شہریاں دی زندگی بہتر بنانا اے۔ اعلامیے دے مطابق سارے وزیراں نال کفایت شعاری مہم، اقدامات تے آؤندے پلان بارے وی گل بات کیتی گئی۔ وزیراں دی کارکردگی ہور بہتر بنان لئی اقدامات بارے وی پُچھیا گیا۔ وزیراعظم عمران خان نے وزیراں نوں سٹرٹیجک پلان تیار کرن دی ہدایت کیتی۔ وزیر اعظم دی ہدایت اُتے پلان پنج سال لئی بنایا جائے گا۔ وزیر اعظم نے ہر وزیر کولوں تن سوال کیتے کہ وزارت و چ ہن تیکر کیہڑے کیہڑے منصوبے شروع کیتے گئے ؟ دوجا سوال پُچھیا گیا کہ بطور وزیر آن والے ویلے وچ کیہ کرن والے او؟جدکہ تیجا سوال پُچھیا گیا کہ بطور وزیر خرچیاں وچ کِنی کمی کیتی۔