اسلام آباد(پاکستان پوائنٹ نیوز11۔دسمبر۔2018ء) وزیراعظم عمران خان نے اقتدار وچ آؤندے ای کفایت شعاری مہم دے تحت وادھو خرچے نہ کرن تے سادگی اپنان دا عہد کیتا جیہدے اُتے کافی حد تیکر عملدرآمد ہور ہیا اے۔ایہدی تازہ مثال وزیر اعظم عمران خان دے غیر ملکی دوریاں دیاں تفصیلاں دے ساہمنے آن والے خرچے نیں۔وزیر اعظم عمران خان دے غیر ملکی دوریاں دے خرچیاں دیاں تفصیلاں قومی اسمبلی وچ جمع کروا دتیاں گئیاں۔
وزارت خارجا ولوں جمع کروائی گئی رپورٹ دے مطابق دوریاں اُتے 4کروڑ 3لکھ81ہزار رُپئے خرچ آیا۔رپورٹ دے مطابق وزارت خارجا نے وزیر اعظم عمران خان دے 18ستمبر توں 20نومبر تیکر غیر ملکی دوریاں دیاں تفصیلاں قومی اسمبلی وچ جمع کروائیاں۔ وزارت خارجا دیاں تفصیلاں دے تحت وزیر اعظم عمران خان نے 6غیر ملکی دورے کیتے نیں۔ ایہناں دوریاں اُتے 4کروڑ 3لکھ81ہزار رُپئے خرچ آیا۔
وزیر اعظم عمران خان نے وفد نال چین دا 5دناں لئی دورہ کیتا۔ چین دے دورے اُتے 2کروڑ 44لکھ رُپئے خرچ ہوئے۔ ملائیشیا دے دورے اُتے 75لکھ43ہزار،سعودی عرب دے دورے دوران 30لکھ99ہزار، ابوظہبی دے دورے اُتے 4لکھ33ہزار، 18نومبر نوں ابوظہبی دے دوجے دورے اُتے 39لکھ 90ہزار رُپئے خرچ ہوئے۔ایس توں وکھ ریاض دے دوجے دورے اُتے 8لکھ 70ہزار رُپئے خرچے ہوئے نیں۔
وزیر اعظم عمران خان دے ایہ 6غیر ملکی دورے سابق وزیر اعظم نواز شریف دے دورہ برطانیہ دے مقابلے وچ کیتے سستے نیں۔ وزارت خارجا ولوں قومی اسمبلی وچ جمع کروائیاں جان والیاں دستاویزات وچ دسیا گیا کہ نواز شریف 22مئی2016نوں علاج لئی لندن گئے تے لندن جان لئی اوہناں نے خصوصی جہاز ورتیا۔ نواز شریف دے لندن وچ رہن دی وجہ توں خصوصی جہاز واپس گھل دتا گیا۔
جیہدے مگروں 9جولائی 2016نوں سابق وزیر اعظم نواز شریف نوں لیان لئی خصوصی جہاز لندن گھلیا گیا۔ وزارت خارجا ولوں ساہمنے آن والیاں دستاویزات دے مطابق سابق وزیر اعظم نواز شریف دایہ وی وی آئی پی دورہ قومی خزانے نوں 3کروڑ 45لکھ رُپئے وچ پیا۔ ایہدے اُتے وزیر اعظم عمران خان دے چھ غیر ملکی دوریاں اُتے مجموعی طور اُتے 4کروڑ3لکھ 81ہزار رُپئے خرچ آیا۔
