لاہوریاں اُتے کوڑا ٹیکس لان دا فیصلا

لاہوریاں اُتے کوڑا ٹیکس لان دا فیصلا

لاہور(پاکستان پوائنٹ نیوز10۔دسمبر۔2018ء) حکومت نے لاہوریاں اُتے 88رُپئے توں 300رُپئے فی مرلے دے حساب نال ٹیکس لان دا فیصلا کر لیا۔ تفصیل دے مطابق لاہور دی صفائی لئی کم کرنی والی کمپنی’لاہور ویسٹ مینجمنٹ‘ اُتے آن والے خرچے اک سوالیہ نشان بن گئے نیں۔ نویں حکومت دا آکھنا اے کہ اوہ شہر دی صفائی لئی اینے پیسے نہیں دے سکدی۔ 2دن پہلاں صوبائی وزیر بلدیات عبدالعلیم خان نے آکھیا سی کہ حکومت کوڑا چُکن لئی ارباں رُپئے خرچ نہیں کر سکدی ، ایس لئی صفائی اُتے ٹیکس لایا جائے گا تے لاہور دے شہری ہن کوڑا چُکن اُتے پیسے وی آپے دین گے۔

اوہناں دا آکھنا سی کہ بجٹ کسارا(خسارہ) بہتا اے۔ مہنگائی دا جن لوکائی نوں سہنا پئے گا۔ خشخبریاں 2019وچ ملن گیاں۔ اوہناں دا ہور آکھنا سی کہ حکومت اک روپیہ خرچ کیتے بغیر کمپنیاں کولوں کوڑے نال بجلی پیدا کرن لئی کنٹریکٹ کرے گی۔ ٹیکس ماڈل تے ماڑے علاقیاں نوں نظر وچ رکھدے ہوئے لایا جائے گا۔پر ہن لاہور ویسٹ مینجمنٹ کمپنی نے صفائی دے پیسے لین دا فیصلا کر لیا اے۔ فیصلے دے تحت شہر دے رہائشی علاقیاں وچ 88رُپئے توں لے کے 300رُپئے فی مرلے دے حساب نال ٹیکس لگے گا جدکہ کمرشل علاقیاں دی کیٹیگریز بنائیاں جان گیاں تے ایہدے مگروں اوہناں دے ریٹ طے کیتے جان گے۔یاد رہوے کہ ایس توں پہلاں صرف ہاؤسنگ سوسائیٹیاں 334رُپئے فی ٹن دے حساب نال ٹیکس دیندیاں سن۔