شیخ رشید بازی لے گئے

وفاقی وزیر نے چنگی کارکردگی وکھان وچ سارے وزیراں نوں پچھانہ چھڈ دتا

شیخ رشید بازی لے گئے
وفاقی وزیر نے چنگی کارکردگی وکھان وچ سارے وزیراں نوں پچھانہ چھڈ دتا

اسلام آباد(پاکستان پوائنٹ نیوز10۔دسمبر۔2018ء) اج وزیراعظم عمران خان دی صدارت ہیٹھ وفاقی کابینہ دا اجلاس ہویا۔ اجلاس وچ کئی اہم فیصلے کیتے گئے ۔ میڈیا رپورٹس دے مطابق وزیر اعظم عمران خان دی صدارت ہیٹھ ہون والے اجلاس وچ وزیراں دی 100دناں دی کارکردگی دا جائزہ لیا گیا۔ وزیر اعظم نے کابینہ دے اجلاس لئی سارا دن رکھیا۔ وفاقی کابینہ دے اجلاس مگروں جاری کیتے گئے اعلامیے دے مطابق اجلاس وچ سارے وزیراں دی کارکردگی دا جائزہ لیا گیا اے۔

وزیر اعظم نے وزیراں دی کارکردگی دا جائزہ لین لئی ہر 3مہینے بعد اجلاس سدن دا فیصلا کیتا اے۔ اعلامیے وچ ہور لکھیا گیا اے کہ وزیراں نوں ہور ٹاسک دین دا فیصلا وی کیتا گیا اے۔ کارکردگی دا جائزہ لین دا مقصد شہریاں دی زندگی بہتر بنانا اے۔ اعلامیے دے مطابق سارے وزیراں نال کفایت شعاری مہم، اقدامات تے آؤندے پلان بارے وی گل بات کیتی گئی۔ وزیراں دی کارکردگی ہور بہتر بنان لئی اقدامات بارے وی پُچھیا گیا۔

وزیراعظم عمران خان نے وزیراں نوں سٹرٹیجک پلان تیار کرن دی ہدایت کیتی اے۔ وزیر اعظم دی ہدایت اُتے پلان پنج سال لئی بنایا جائے گا۔ وزیر اعظم نے ہر وزیر کولوں تن سوال کیتے کہ وزارت و چ ہن تیکر کیہڑے کیہڑے منصوبے شروع کیتے گئے ؟ دوجا سوال پُچھیا گیا کہ بطور وزیر آن والے ویلے وچ کیہ کرن والے او؟جدکہ تیجا سوال پُچھیا گیا کہ بطور وزیر خرچیاں وچ کِنی کمی کیتی۔

رپورٹس دے مطابق شیخ رشید کارکردگی وچ سارے وزیراں توں بازی لے گئے نیں۔ وزیر خارجا شاہ محمود قریشی دا آکھنا اے کہ جو رپورٹاں پہلاں وزیراعظم نوں گھلیاں گئیاں سن اج اوہناں اُتے بریفنگ دتی گئی اے۔ وزارتاں ولوں حاصل کردہ ٹارگٹ اُتے وزیراعظم نوں بریفنگ دتی گئی۔ وفاقی سیکرٹیاں نے وی وزیر اعظم نوں ایس حوالے نال دسیا۔ ایس توں وکھ شاہ محمود قریشی دا آکھنا سی کہ اتحادیاں سنے سارے وزیراں دی کارکردگی تسلی بخش اے۔

یاد رہوے کہ شیخ رشید نے وزارت دے پہلے ای مہینے ریلوے دی آمدن وچ 55کروڑ رُپئے دا وادھا کیتا۔ عوامی مسلم لیگ دے سربراہ شیخ رشید احمد نے 12ورھیاں پچھوں فیر ریلوے دا قلمدان سنبھالیا اے۔ وزیر ریلوے بنن دے پہلے مہینے ای ریلوے دی آمدن وچ حیران کن طور اُتے وادھا ہویا اے۔ نویں حکومت آن مگروں محکمہ ریلوے دی آمدنی وچ 55کروڑ رُپئے دا وادھا ہویا۔ پاکستان ریلوے اُتے سالہوار(سالانہ) 96ارب رُپئے خرچ ہوندے نیں۔ جیہدے وچوں 50ارب رُپئے ریلوے دی اپنی آمدن اے جدکہ 36ارب رُپئے دا کسارا(خسارہ) ہوندا سی پر ریلوے دے ایس کسارے وچ کمی دی آس پیدا ہوئی۔ ریلوے دی آمدن وچ چھ ارب رُپئے سالہوار وادھا ہون مگروں ریلوے دا کسارہ گھٹ ہو کے 29ارب تیکر محدود ہون دی وی آس اے۔