اسلام آباد(پاکستان پوائنٹ نیوز10۔دسمبر۔2018ء) چیف جسٹس اسلام آباد ہائی کورٹ جسٹس اطہر من اللہ نے اپنے ریمارکس وچ آکھیا اے کہ انسپکٹر جنرل موٹروے نوں بائیکرز اُتے پابندی دا اختیار نہیں، پچھلے 3ورھیاں توں بائیکس نوں چلان دی اجازت دتی تے اوتھے حادثہ وی نہیں ہویا۔ میڈیا رپورٹس دے مطابق اسلام آباد ہائی کورٹ دے چیف جسٹس اطہر من اللہ تے جسٹس میاں گل حسن اورنگزیب نے موٹروے اُتے ہیوی بائیکس چلان دی اجازت بارے کیس دی سنوائی کیتی۔
ایس موقعے اُتے چیف جسٹس اطہر من اللہ نے اپنے ریمارکس وچ آکھیا کہ موٹروے دے انسپکٹر جنرل نوں بائیکرز اُتے پابندی دا اختیار نہیں اے۔ عدالتی حکم مگروں پچھلے 3سال توں ہیوی بائیکس چلان دی اجازت اے تے کیہ موٹروے اُتے کدی کوئی حادثہ ہویا؟عدالت نوں نمائندہ موٹروے پولیس نے دسیا کہ بائیکرز دے چالان ہوئے نیں۔ اسیں اوہناں چالان دا ریکارڈ نال لایا ہویا اے۔
جیہدے اُتے چیف جسٹس نے آکھیا کہ موٹروے اُتے کِنیاں کاراں دے ٹائر برسٹ ہوندے نیں؟گڈیاں دے حادثے وی ہوندے نیں پر کیہ اوہناں اُتے وی پابندی لا دئیے؟ چیف جسٹس نے آکھیا کہ جے بائیکرز آکھ رہے نیں کہ قانون دی پابندی کراں گے تے فیر حرج کیہ اے؟جسٹس حسن اورنگزیب نے آکھیا کہ تہاڈے قانون وچ کُجھ نہیں اے۔ پرمٹ دیو تے جو مردے نیں اوہناں دی قسمت اے۔ چیف جسٹس نے آکھیا کہ تہاڈے پرمٹ دے بغیر کوئی وی موٹروے اُتے نہیں جاسکدا۔یاد رہوے کہ موٹروے اُتے 500سی سی بائیکس لیجان دا فیصلا جسٹس محسن اختر کیانی نے دتا سی۔
