اسلام آباد(پاکستان پوائنٹ نیوز07۔دسمبر۔2018ء) وزیراعظم عمران خان نے اپنے کھڈاریاں دا احتساب وی شروع کر دتا اے۔ وفاقی کابینہ دے پیر نوں سدے گئے اجلاس وچ وزارتاں تے ڈویژناں دی کارکردگی اُتے بریفنگ لِتی جائے گی۔ ہر وزارت تے ڈویژناں نوں بریفنگ لئی دس منٹ دتے جان گے۔ میڈیا رپورٹس دے مطابق حکومتی 100دناں دی کارکردگی وچ کسے وزیر تے مشیر نے کیہ کم کیتا؟وزیراعظم عمران خان نے کابینہ دا خصوصی اجلاس پیر دی سویر ساڈھے 10وجے وزیر اعظم آفس اسلام آباد وچ سد لیا اے۔
اجلاس وچ وزارتاں تے ڈویژناں نوں اپنی کارکردگی وکھان دا موقع دتا جائے گا۔ وسیلیاں دے مطابق وزیر اعظم ہر وزیر، مشیر تے معاون خصوصی دی کارکردگی دا جائزہ لین گے۔ ہر وزارت تے ڈویژناں نوں بریفنگ لئی دس منٹ دتے جان گے۔ بریفنگ مگروں 5منٹ سوالاں جواباں لئی رکھے جان گے۔ یاد رہوے کہ وزیر اعظم عمران خان نے وزیراں دی پہلے سو دناں دی کارکردگی قوم ساہمنے لیان دا فیصلاکردے ہوئے وزارتاں نوں پہلے مرحلے دی کارکردگی رپورٹ جمع کروان دی ہدایت کیتی سی۔وزیر اعظم عمران خان ایہ وی اعلان کر چکے نیں کہ جے کوئی وزیر کم نہیں کر رہیا تے اوہدے کولوں وزارت لے کے کسے ہور دے حوالے کر دتی جائے گی۔
