ممبئی(پاکستان پوائنٹ نیوز07۔دسمبر۔2018ء) وزیر اعظم عمران خان نے بھارت وچ مقبولیت دے جھنڈے گڈ دتے۔ وزیر اعظم عمران خان سال 2018دوران ’یاہو ‘انڈیا وچ سبھ توں ودھ سرچ کیتی جان والی شخصیت وچ 10ویں نمبر اُتے نیں۔ تفصیل دے مطابق وزیر اعظم عمران خان دے پاکستان دے نال نال دنیا بھر و چ چاہن والے موجود نیں۔ عمران خان وزیر اعظم بنن توں پہلے وی دنیا بھر وچ جانے پچھانے جاندے سن۔
پر ہن اوہناں دے وزیر اعظم بنن مگروں دوجے ملکاں نال دوستی دا رشتہ ڈونگھا ہو گیا اے۔ جدوں کہ وزیر اعظم عمران خان بھارت نال چنگے تعلقات دے خاہشمند نیں۔ جے گل کرئیے بھارتیاں دی تے وزیر اعظم عمران خان اوہناں وچ وی بہت مقبول نیں۔ میڈیا رپورٹس دے مطابق ’یاہو‘ سرچ انجن نے کُجھ دن پہلاں ای سُرخیاں وچ رہن والے بندیاں دی لسٹ جاری کیتی اے۔ جیہدے وچ وزیر اعظم پاکستان عمران خان وی ٹاپ ٹین بندیاں وچ شامل نیں۔ 2018وچ بھارتیاں نے سبھ توں بُہتا سنی لیون نوں سرچ کیتا جدکہ ایس لسٹ وچ دوجے نمبر اُتے اداکارہ سری دیوی تے بھارتی وزیر اعظم نریندر مودی تیجے نمبر اُتے رہے۔
