اسلام آباد(پاکستان پوائنٹ نیوز07۔دسمبر۔2018ء) سپریم کورٹ نے ریلوے دی زمین اُتے نجی ہاؤسنگ سوسائیٹیاں بنن دے معاملے اُتے وزیر ریلوے شیخ رشید احمد نوں ذاتی حیثیت وچ سد لیا۔ جمعے نوں چیف جسٹس میاں ثاقب نثار دی سربراہی وچ تن رکنی بنچ نے ریلوے دی زمین اُتے نجی ہاؤسنگ سوسائیٹیاں بنن دے معاملے دی سنوائی کیتی۔ سنوائی دوران وکیل افشاں غضنفر نے آکھیا کہ 1886وچ وچھائے گئے 75کلو میٹر ٹریک نوں 1994وچ ختم کر دتا گیا۔
45کلو میٹر ٹریک ویچ دتا گیا۔ علاقے دے اک مقام اُتے ہاؤسنگ سوسائٹی وی بنائی گئی۔ عدالت نے ریمارکس دیندے ہوئے اعتراض چُکیا کہ ریلوے زمین دوجے مقصداں لئی ورتی جا رہی اے۔ صوبیاں دے ایڈووکیٹ جنرلز دے مطابق کُجھ تھاواں اُتے نجی ہاؤسنگ سوسائیٹیاں بنائیاں گئیاں۔ صوبے 3دناں وچ ریلوے زمین دے غلط استعمال بارے تفصیلاں دین۔ عدالت نے وفاقی وزیر ریلوے شیخ رشید احمد نوں طلب کردے ہوئے آکھیا کہ شیخ رشید تے آکھدے سن، اصلاح کرنی اے اوہ ذاتی حیثیت وچ پیش ہو کے وضاحت دین۔ ایہ ریاستی زمین اے۔جیہدے مگروں عدالت نے کیس دی سنوائی 24دسمبر تیکر ملتوی کر دتی۔
