اسلام آباد(پاکستان پوائنٹ نیوز07۔دسمبر۔2018ء) رشتے دے جھیڑے اُتے شروع ہون والی لڑائی نے اعظم سواتی کولوں وزارت کھوہ لئی۔ اعظم سواتی دے ملازم نے رشتے توں انکار کرن اُتے متاثرہ خاندان دیاں گاواں کھول لئیاں سن۔ تفصیل دے مطابق پچھلے دیہاڑے وفاقی وزیر سائنس و ٹیکنالوجی اعظم سواتی نے اپنے فارم ہاؤس اُتے ہون والے جھیڑے وچ قصور وار ثابت ہون اُتے استعفا دے دتا اے۔اوہناں نے وزیراعظم عمران خان نال ملاقات دوران چالو حالات وچ کم جاری رکھن توں معذرت کیتی۔ اعظم سواتی نے استعفے دی تصدیق کردے ہوئے آکھیا کہ استعفا وزیر اعظم نوں پیش کیتا جو اوہناں نے قبول کیتا۔ اعظم سواتی دا آکھنا سی کہ اپنے خلاف کیس دا بغیر عہدے توں ساہمنا کراں گا۔اوہناں دا آکھنا سی کہ وزیر اعظم نوں دس دتا عہدہ معنی نہیں رکھدا۔ اوہناں نے عدالتی فیصلا آن تیکر کم جاری رکھن نوں آکھیا پر میں اوہناں نوں منالیا۔ اوہناں نے ہور آکھیا کہ بغیر کسے اتھارٹی دے کیس وچ پیش ہوکے دفاع کراں گا۔
رپورٹ ساہمنے آن مگروں مشہور پرچا کار رؤف کلاسرا نے آکھیا کہ اصل وچ اعظم سواتی دے اک ملازم نے اپنے پُتر لئی باجوڑ خاندان کولوں رشتہ منگیا گیا سی جیہدے اُتے باجوڑ خاندان نے انکار کیتا۔ اعظم سواتی دے ملازم نے انکار نوں دل اُتے لے کے انا دا مسئلا بنا لیا۔ جیہدے مگروں اوس ملازم نے باقی ملازماں نال رلکے اوس خاندان دیاں گاواں کھول کے اپنی زمین اُتے بنھ دتیاں۔جواب وچ ذکر کیتا گیا خاندان اعظم سواتی دے ملازماں ساہمنیوں کٹا کھول کے لیا گیا۔ ایہدے توں جھیڑے دی شروعات ہوئی۔رؤف کلاسرا دا آکھنا سی کہ پہل اعظم سواتی دے ملازماں نے کیتی جدوں کہ جواب وچ باجوڑ خاندان دے لوکاں نے وی ملازماں اُتے حملا کیتا تے اک دوجے نوں تشدد دا نشانہ بنایا۔اعظم سواتی دے پُتر نے سارا معاملا اپنے ابا جی نوں دسیا تے اوہناں نے آئی جی اسلام آباد نوں فون کر کے آکھیا کہ میرے گھر اُتے 12توں 15دہشت گرداں نے حملا کیتا اے تے ایہو گل اوہناں نے سارے پولیس افسراں نوں وی دسی۔جو جھوٹھ سی تے ایہدے مگروں جو کُجھ وی ہویا ساریاں ساہمنے اے۔ انج رشتے دا جھیڑا گاں دے معاملے وچ بدل گیا تے گاں دا معاملا جھیڑے دی وجہ بنیا تے انج ایہ جھیڑا سواتی دی وزارت لے گیا۔
