وزیر اعظم دا امریکی صدر دے خط دا جواب دین دا فیصلا

وزیر اعظم دا امریکی صدر دے خط دا جواب دین دا فیصلا

اسلام آباد(پاکستان پوائنٹ نیوز07۔دسمبر۔2018ء) وزیر اعظم عمران خان نے امریکی صدر ڈونلڈ ٹرمپ دے خط دا جواب دین دا فیصلا کیتا اے۔ میڈیا رپورٹس وچ دسیا گیا اے کہ وزیر اعظم عمران خان نے امریکی صدر ولوں گھلے گئے خط اُتے مثبت ردعمل دین دا فیصلا کیتا اے۔ ایس حوالے نال وزیراعظم نے وزارت خارجا نوں امریکی صدر دا خط دے کے جواب تیار کرن دی ہدایت کیتی اے۔

میڈیا رپورٹس دے مطابق وزیراعظم عمران خان ولوں گھلے گئے خط وچ افغان مفاہمتی عمل وچ کردار ادا کرن دی یقین دہانی کروائی جائے گی۔ خط وچ پاک امریکا سٹرٹیجک مذاکرات دی بحالی دی تجویز وی دتی جائے گی۔ ایس توں وکھ خط وچ دو پاسی تجارتی و معاشی رابطیاں نوں ودھان بارے وی زور دتا جائے گا۔ یاد رہوے کہ پیر نوں وزیر اعظم عمران خان نے پرچا کاراں نال گل بات کردے ہوئے انکشاف کیتا سی کہ اوہناں نوں امریکی صدر دا خط ملیا اے۔

خط دے متن وچ ایہ وی لکھیا گیا اے کہ پاکستان طالبان نوں مذاکرات دی میز اُتے لیائے۔وزیر اعظم عمران خان دا آکھنا سی کہ جنوبی پنجاب دے معاملے وچ ساڈی دلچسپی اے تے ہوسکدا اے کہ ملک وچ ویلے توں پہلاں الیکشن ہون، جدوں کہ آن والے دس دناں وچ وزارتاں وی بدلیاں جا سکدیاں نیں۔ اوہناں نے ہور آکھیا کہ میں کوئی اقربا پروری نہیں کیتی۔ زلفی بخاری دے معاملے اُتے اقربا پروری دے ریمارکس اُتے دُکھ ہویا۔ وزیر اعظم عمران خان نے منی لانڈرنگ دے حوالے نال گل بات کردے ہوئے آکھیا کہ اسیں منی لانڈرنگ اُتے سخت قانون لیا رہے آں جیہدے وچ وڈے وڈے لوک ساہمنے آن گے۔ پر اجے وڈے وڈے لوک ناں ساہمنے آن توں ڈر رہے نیں۔