اسلام آباد(پاکستان پوائنٹ نیوز06۔دسمبر۔2018ء) پاکستانیاں دا سپین وچ چائلڈ پونو گرافی وچ ملوث ہون دا انکشاف ہویا اے۔ میڈیا رپورٹس وچ دسیا گیااے کہ ڈائریکٹر جنرل (ایف آئی اے) سائبر کرائم سیل کیپٹن (ر) محمد شعیب نے انکشاف کیتا اے کہ اوہناں نوں سپین وچ جاری چائلڈ پونو گرافی رنگ وچ پاکستانیاں دے ملوث ہون بارے معلومات ملیاں نیں۔ اوہناں نے اک مقامی ٹی وی چینل نال گل بات کردے ہوئے ایہ انکشاف کیتا۔
اوہناں نے آکھیا کہ ہسپانوی حکام نے ایس بارے پاکستان وچ ایف آئی اے نال رابطہ کیتا اے۔ اوہناں نے آکھیا کہ بین الاقوامی پدھر اُتے بالاں دیاں فحش فلماں بنان وچ پاکستانیاں دے ملوث ہون دا ثبوت ملیا اے۔ اوہناں نے آکھیا کہ ایجنسی نوں دو قسم دے مجرماں بارے شکایتاں مل رہیاں نیں۔ اک اوہ جو مقامی پدھر اُتے فحش عکاسی وچ ملوث نیں تے دوجے اوہ جو بین الاقوامی پدھر اُتے ایس کم وچ ملوث نیں۔
اوہناں نے ہور آکھیا کہ کراچی وچ ہون والی حالیہ گرفتاری وی ایسے شکایت دے سلسلے وچ کیتی گئی سی۔ ایف آئی اے نے ہفتے دے دیہاڑے کراچی توں حماد نامی نوجوان نوں گرفتار کیتا جو 14دناں دے ریمانڈ اُتے پولیس دے حوالے اے۔ اوہناں دا آکھنا سی کہ جتھے تیکر حالیہ کیس دی گل اے تے ایس حوالے نال ایہ خبر ساہمنے آئی اے کہ ملزماں نے وٹس ایپ اُتے گروپ بنایا ہویا سی جیہدے وچ 1600پاکستانی شہری ایڈ سن ،جیہناں وچ بال تے سوانیاں وی شامل نیں۔ کیپٹن (ر) محمد شعیب دا آکھنا سی کہ ایس گروپ وچ کُجھ غیر ملکی بندے وی شامل سن ۔
