اسلام آباد(پاکستان پوائنٹ نیوز06۔دسمبر۔2018ء) چالو ورھے اکتوبر دے مہینے وچ قطری وزیر خارجا محمد بن عبدالرحمان دی اسلام آباد آمد مگروں پاکستانی وزیر خارجا نال اوہناں دی ملاقات ہوئی سی۔ ایس دوران دوویں رہنماواں وچکار باہمی دلچسپی تے تعلقات ودھان دے حوالے نال وچار وٹاندرا کیتا گیاسی ۔ ایس موقعے تے قطری وزیر خارجا نے پاکستانیاں نوں اک لکھ نوکریاں وی دین دا اعلان کیتاسی۔
جیہدا پاکستانی وزیر خارجا شاہ محمود قریشی نے خیرمقدم کیتا۔پر ہن اک لکھ نوکریاں مگروں قطر دا شاندار اعلان ساہمنے آیا اے۔قطر سکولاں توں باہر 10لکھ پاکستانی بالاں نوں تعلیم دیوے گا۔قطر دے قومی دن دے موقعے اُتے قطری سفارتخانے وچ تقریب ہوئی ۔ تقریب وچ قطری سفارتکاراں توں وکھ پاکستانی حکام وی رلتی ہوئے۔ تقریب نال خطاب کردے ہوئے قطری سفیر صقر بن مبارک نے آکھیا کہ توانائی دے شعبیاں وچ دوویں ملک اک دوجے نال تعاون کر رہے نیں۔ قطر وچ ایس ویلے 40ہزار پاکستانی کم کر رہے نیں۔ جدکہ پاک قطر مشترکہ کمپنیاں دی گنتی 800اے۔ اوہناں نے ہور آکھیا کہ قطر سکولاں توں باہر 10لکھ بالاں نوں تعلیم دیوے گا۔
