راولپنڈی(پاکستان پوائنٹ نیوز06۔دسمبر۔2018ء) چیف آف آرمی سٹاف جنرل قمر جاوید باجوہ نے آکھیا اے کہ ملک نوں اک اک اِٹ لا کے فیر بنا رہے آں، پاکستان وچ آئین دے مطابق قانون دی حکمرانی چاہنے آں، ایسا ملک بناواں گے جتھے کوئی بندہ یاں ادارہ ملک توں اُچا نہ ہوئے۔ ترجمان پاک فوج میجر جنرل آصف غفور نے اج میڈیا بریفنگ دوران آرمی چیف جنرل قمر جاوید باجوہ دا سنیہا پڑھ کے سُنایا۔
آرمی چیف جنرل قمر جاوید باجوہ نے آکھیا کہ پاکستان وچ آئین دے مطابق قانون دی حکمرانی چاہنے آں۔ پاکستان دی ترقی لئی سارے رلکے اپنا کردار نبھان۔ اوہناں نے آکھیا کہ ملک نوں اک اک اِٹ لا کے فیر بنا رہے آں۔پاکستان وچ آئین دے مطابق قانون دی حکمرانی چاہنے آں۔ایس توں وکھ میجر جنرل آصف غفور نے میڈیا بریفنگ وچ آکھیا کہ سکیورٹی صورتحال بارے گل کرنا چاہنا واں۔
اج سرحداں تے ملکی صورتحال بارے آگاہ کراں گا۔ جنگ بندی سمجھوتے دیاں خلاف ورزیاں وچ وادھا ہو رہیا اے۔ سرحداں اُتے ملٹری نوں نشانہ نہیں بنایا جا رہیا اے، بھارتی فورسز جان بُجھ کے شہری آبادی نوں نشانہ بنا رہیاں نیں۔ 2017تے 2018وچ سیز فائر سمجھوتے دیاں خلاف ورزیاں ہوئیاں۔2018وچ 2593وار سیز فائر دی خلاف ورزی کیتی گئی۔2018وچ 55شہری شہید تے 300زخمی ہوئے نیں۔
اوہناں دا آکھنا سی کہ حکومت پاکستان نے بھارت نال امن لئی بہت سارے معاملات اُتے پہل کیتی اے۔ پر بھارت ولوں مذاکرات اُتے رضا مندی دا وکھالا نہیں کیتا جاندا۔ اوہناں نے آکھیا کہ بھارت کرتار پور نوں منفی انداز وچ پیش کر رہیا اے۔ کرتار پور راہداری نال پاکستان ولوں کوئی بھارت نہیں جا سکے گا۔ روز دی بنیاد اُتے چار ہزار سکھ یاتری آ تے جا سکن گے۔
سکھ براداری لئی اک راہ ہوئے گا۔ راہ اُتے کنڈیالی تاریاں لائیاں جان گیاں۔ اوہناں بھارتی آرمی چیف دے بیان دے جواب وچ آکھیاکہ اسیں سکھ مذہب دے احترام وچ کرتار پور بارڈر کھول دتا۔ پر بھارت نے بابری مسجد وچ کیہ کیتا؟گجرات وچ کیہ کیتا؟بھارت وچ مسلماناں دی کیہ حالت اے، سبھ جاندے نیں۔ بھارت اپنے آپ نوں سیکولر بنائے فیر دوجیاں نوں درس دیوے۔ اسیں جِداں دے آں سانوں برداشت کرے۔
