لاہور(پاکستان پوائنٹ نیوز05۔دسمبر۔2018ء) پاکستان تحریک انصاف دی حکومت نے اقتدار وچ آن مگروں کئی انج دے کم کیتے نیں جیہناں نوں لوکائی ولوں سلاہیا جا رہیا اے۔ ایہناں کماں وچ عام لوکاں دے فائدے دے کم وی شامل سن۔ پر ہن وفاقی حکومت نے سرکاری تعلیمی اداریاں وچ قرآن پاک دی تعلیم نوں لازمی قرار دیندے ہوئے سارے سرکاری سکولاں وچ لازمی طور اُتے قران پاک دی تعلیم دین دا حکم جاری کیتا اے۔
وسیلیاں دے مطابق ایس حوالے نال وزارت مذہبی امور و حج بین المذاہب ہم آہنگی ولوں چیف سیکرٹری پنجاب، سندھ، خیبرپختونخوا، بلوچستان توں وکھ جموں و آزاد کشمیر تے گلگت بلتستان نوں اک مراسلا وی گھلیا گیا اے۔ گھلے گئے مراسلے وچ آکھیا گیا اے کہ پرائمری، مڈل تے سیکنڈری سکولاں وچ پڑھن والے پڑھیاراں نوں سرکاری اداریاں وچ لازمی طور اُتے قرآن پاک دی تعلیم دتی جائے۔
مراسلے وچ ہدایت کیتی گئی اے کہ سرکاری سکولاں وچ قرآن پاک پڑھان لئی قرات دیاں خصوصی کلاساں دا انتظام کیتا جائے تاں جے سرکاری پدھر اُتے بالاں نوں قرآن پاک دی تعلیم دتی جاسکے۔دوجے پاسے چیف سیکرٹری آفس دے وسیلیاں مطابق پنجاب سکولز ایجوکیشن وچ قرات دیاں آسامیاں دی مجموعی گنتی 160اے۔ جیہناں وچوں 120آسامیاں خالی نیں۔
