چیف جسٹس دا شکر گزار آں جیہناں نے پاناما کیس دا فیصلا دے کے نویں پاکستان دی نینہ رکھی:وزیراعظم

چیف جسٹس دا شکر گزار آں جیہناں نے پاناما کیس دا فیصلا دے کے نویں پاکستان دی نینہ رکھی:وزیراعظم

اسلام آباد(پاکستان پوائنٹ نیوز05۔دسمبر۔2018ء) وزیر اعظم عمران خان نے ودھدی ہوئی آبادی اُتے سمپوزیم دی تقریب نال خطاب کردے ہوئے چیف جسٹس دا شکریہ ادا کردے ہوئے آکھیا کہ شکر اے تُسیں اج مینوں ایتھے سدیا، کورٹ روم نمبر ون وچ نہیں سدیا۔تقریب نال خطاب دوران وزیر اعظم عمران خان نے آکھیا کہ میں چیف جسٹس دا شکر گزار آں جیہناں نے پاناما کیس دا فیصلا دے کے نویں پاکستان دی نینہ رکھی۔

اسیں پاکستان نوں مدینہ ورگی ریاست بنان لئی کوششاں کردے رہواں گے۔ اوہناں نے آکھیا کہ جمہوری حکومت صرف اپنے لئی پنج سال دا سوچدی اے۔ ساڈے ایتھے ملک وچ انتخابات ہوندے سن پر قانون اُتے عملدرآمد نہیں ہوندا سی۔ شارٹ ٹرم سوچ دی وجہ توں ای اسیں اوکڑاں دا شکار ہوئے۔ اوہناں دا آکھنا سی کہ جدوں منگلا تے تربیلا ڈیمز بنے اودوں پاکستان وچ اگے دا سوچیا جاندا سی۔

پر ہن جمہوری حکومتاں صرف پنج سال دا سوچدیاں نیں کہ ہن سانوں اگلا الیکشن جِتن لئی کیہ کرنا اے۔ اوہناں دا آکھنا سی کہ ایوب خان محدود سوچ رکھدے سن، 60دے دہاکے وچ ملک بھرپور ترقی کر رہیا سی۔ وزیر اعظم نے آکھیا کہ میرے کناں نے ایہ وی سِنیا کہ چنگا ہویا بنگلا دیش وکھ ہو گیا اوہ پاکستان اُتے بھار سی۔اوہناں دا آکھنا سی کہ جن بوتل وچوں نکل گیا اے۔

ہن کوئی نہیں سوچے گا کہ اوہ قانون توں اُچا اے۔وزیر اعظم نے آکھیا کہ سی ڈی اے میرے ماتحت اے تے میرے ماتحت ادارہ سی ڈی اے اج عدالت نوں بنی گالا دی صورتحال دس رہیا اے انج پہلے کدی ویکھن وچ نہیں آیا۔ جمہوریت تے قانون دی حکمرانی لازم و ملزوم نیں۔ یاد رہوے کہ اسلام آباد وچ سپریم کورٹ ولوں ودھدی ہوئی آبادی اُتے سمپوزیم دا آہر کیتا گیا اے۔ جیہدے وچ چارے صوبیاں دے وزیر اعلا تے مشہور عالم دین مولانا طارق جمیل سنے ہور لوک رلتی ہوئے۔