اسلام آباد(پاکستان پوائنٹ نیوز05۔دسمبر۔2018ء) ملک بھر وچ پانی بحران دے خدشے نوں مُکھ رکھدے ہوئے ڈیم بنان دا اعلان کیتا گیا۔ اعلان مگروں چیف جسٹس نے ڈیم فنڈ وی قائم کیتا۔ چیف جسٹس دے ڈیم فنڈ وچ وزیراعظم عمران خان نے وی عطیہ دتا دین دی اپیل کیتی جیہدے مگروں ایس فنڈ دا ناں وزیر اعظم چیف جسٹس ڈیم فنڈ رکھیا گیا۔ ڈیم بنان دا اعلان تے کیتا گیا اے پر سوال ایہ اے کہ ملک بھر وچ ضائع ہون والے پانی نوں کیویں بچایا جائے۔
ہُن ایس مشکل ترین سوال دا جواب پاکستان دی اک سوانی سائنسدان نے لبھ لیا اے۔پنجاب یونیورسٹی دی سابق یونیسکو چیئر ہولڈر، ریسرچ آفیسر و مرکز برائے مربوط پہاڑی علاقہ جات اُتے تحقیق دی موڈھن ڈائریکٹر و سارک ریجن وچ پہلی پروفیسر ڈاکٹر خالدہ مسرت نے ملک بھر وچ ودھدے ہوئے پانی بحران نوں مُکھ رکھدے ہوئے ،زمین ہیٹھ موجود گندے پانی نوں صاف کرکے فیر ورتن دے قابل بنان دا اک طریقہ ایجاد کیتا اے۔
اوہناں نے آکھیا کہ ایہدے لئی ویسٹ واٹر سیگریگیشن سٹریٹجی دی ضرورت اے جیہدے تحت گندے پانی نوں صاف پانی توں وکھ کیتا جا سکدا اے۔ اوہناں دا آکھنا سی کہ میں ایہدے اُتے ریسرچ کیتی جیہدے اُتے سانوں سلاہیا گیا۔ اوہناں نے آکھیا کہ صرف لاہور وچ ای روز 90ہزار لیٹر پانی نوں گندا ہون توں بچا کے ورتیا جاسکد ااے۔ اوہناں نے آکھیا کہ وزیر اعظم پاکستان تے اوہناں دے پالیسی سازاں سنے سارے بااثر بندیاں توں بینتی اے کہ اگانہ ودھن تے میرے ایس کم وچ میرا ساتھ دین۔
