اسلام آباد(پاکستان پوائنٹ نیوز05۔دسمبر۔2018ء) امریکی محکمہ خارجا و نیشنل سکیورٹی کونسل نے امریکی صدر ٹرمپ ولوں وزیر اعظم عمران خان نوں خط گھلن دی تصدیق کر دے ہوئے آکھیا کہ خط وچ پاکستان ولوں اپنی زمین اُتے طالبان دے ٹھکانے ختم کرن دی صلاحیت دا اعتراف کیتا گیا اے۔ تفصیل دے مطابق وائٹ ہاؤس نے امریکی صدر ٹرپ ولوں عمران خان نوں خط گھلن دی تصدیق کر دتی اے۔
ترجمان محکمہ خارجا و نیشنل سکیورٹی کونسل دا آکھنا اے کہ وزیر اعظم پاکستان توں افغانستان وچ امن لئی تعاون دی درخاست کیتی اے۔ خط وچ پاکستان ولوں اپنی زمین اُتے طالبان دے ٹھکانے ختم کرن دی صلاحیت دا اعتراف وی کیتا گیا اے۔ایس توں وکھ خط وچ پاکستان توں امریکا دے خصوصی سفیر زلمے خلیل زاد توں تعاون دی درخاست کیتی گئی اے۔ خط وچ ایہ وی آکھیا گیا اے کہ افغان امن عمل وچ پاکستان دی مدد پاک امریکا تعلقات دی بہتری لئی ضروری اے۔
یاد رہوے کہ پیر نوں وزیر اعظم عمران خان نے پرچا کاراں نال گل بات کردے ہوئے انکشاف کیتا سی کہ اوہناں نوں امریکی صدر دا خط ملیا اے۔ خط دے متن وچ ایہ وی لکھیا گیا اے کہ پاکستان طالبان نوں مذاکرات دی میز اُتے لیائے۔وزیر اعظم عمران خان دا آکھنا سی کہ جنوبی پنجاب دے معاملے وچ ساڈی دلچسپی اے تے ہوسکدا اے کہ ملک وچ ویلے توں پہلاں الیکشن ہون، جدوں کہ آن والے دس دناں وچ وزارتاں وی بدلیاں جا سکدیاں نیں۔
اوہناں نے ہور آکھیا کہ میں کوئی اقربا پروری نہیں کیتی۔ زلفی بخاری دے معاملے اُتے اقربا پروری دے ریمارکس اُتے دُکھ ہویا۔ وزیر اعظم عمران خان نے منی لانڈرنگ دے حوالے نال گل بات کردے ہوئے آکھیا کہ اسیں منی لانڈرنگ اُتے سخت قانون لیا رہے آں جیہدے وچ وڈے وڈے لوک ساہمنے آن گے۔ پر اجے وڈے وڈے لوک ناں ساہمنے آن توں ڈر رہے نیں۔
