لاہور(پاکستان پوائنٹ نیوز04۔دسمبر۔2018ء) پنجاب حکومت نے لیپ ٹاپ سکیم بند کر دتی،2مہینے پہلاں کیتے گئے اعلان اُتے عمل کردے ہوئے پچھلی حکومت دے منصوبے لئی رکھیا گیا بجٹ ختم کر دتا گیا۔تفصیل دے مطابق تحریک انصاف دی پنجاب حکومت نے مسلم لیگ (ن) دی پچھلی حکومت دے کئی منصوبیاں نوں بند کرن دا فیصلا کیتا اے۔ تحریک انصاف دی پنجاب حکومت دا موقف اے کہ (ن) لیگ دی پچھلی حکومت نے کئی غیر ضروری منصوبیاں راہیں قومی خزانے نوں ارباں رُپئے دا نقصان اپڑایا۔
ایس لئی ایہناں منصوبیاں نوں بند کر دتا جائے گا۔ایس سلسلے وچ پنجاب حکومت نے (ن) لیگ دور وچ شروع ہون والی لیپ ٹاپ سکیم ختم کرن دا اعلان وی کر دتا اے۔ وزیر ہائر ایجوکیشن راجا یاسر ہمایوں سرفراز نے دسیا کہ لیپ ٹاپ مُل لین لئی خزانے نوں بھاری نقصان اپڑایا گیا تے پڑھیاراں نوں دتے گئے لیپ ٹاپس دی کوالٹی وی کوئی اینی چنگی نہیں ۔اوہناں دا آکھنا سی کہ لیپ ٹاپ سکیم اُتے 20ارب خرچ کیتے گئے پر سکیم دے کوئی خاص نتیجے برآمد نہیں ہوئے۔ اوہناں دا آکھنا سی کہ لیپ ٹاپ سکیم دا سارا ریکارڈ نیب دے حوالے کر دتا گیا اے تے چالو(موجودہ) حکومت نے لیپ ٹاپ سکیم لئی بجٹ وچ کوئی پیسے نہیں رکھے۔
