اسلام آباد(پاکستان پوائنٹ نیوز04۔دسمبر۔2018ء) وزیر اعظم عمران خان نال ملاقات مگروں ناروے دی موبائل کمپنی نے پاکستان وچ سرمایہ کاری دے تجربے نوں تسلی بخش قرار دے دتا۔ میڈیا رپورٹس وچ دسیا گیا اے کہ وزیر اعظم عمران خان نال ناروے دی موبائل کمپنی دے حکام نے ملاقات کیتی اے۔ ملاقات دوران ’ٹیلی نار گروپ‘ دے صدر نے پاکستان وچ سرمایہ کاری دے تجربے نوں تسلی بخش قرار دیند ے ہوئے ٹیلی کام شعبے وچ تعاون فراہم کرن اُتے حکومت دا شکریہ ادا کیتا۔
صدر موبائل کمپنی گروپ نے آکھیا کہ ٹیلی نار نے پاکستان وچ 3.5ارب ڈالر دی سرمایہ کاری کیتی تے سرمایہ کاری نال 5ہزار لوکاں نوں روزگار ملیا۔ گروپ صدر نے آؤندے ویلے دی منصوبہ بندی بارے وی وزیر اعظم عمران خان نوں بریفنگ دتی۔ ایس موقعے اُتے وزیر اعظم عمران خان دا آکھنا سی کہ حکومت پاکستان وچ علمی بنیاداں اُتے معیشت نوں ودھوتری(فروغ) دینا چاہندی اے، حکومتی ترقیاتی ایجنڈے وچ ٹیلی نار گروپ دی رلت نوں سلاہندے آں۔ عمران خان نے آکھیا کہ حکومت سرمایہ کاری وچ شفافیت لیانا چاہندی اے۔ سرمایہ کاراں نوں سہولتاں دیواں گے۔
