اسلام آباد(پاکستان پوائنٹ نیوز04۔دسمبر۔2018ء) مشہور آن لائن ٹیکسی سروس ’کریم‘ نے پاکستان بھر وچ اپنیاں بساں چلان دا فیصلا کر لیااے۔ تفصیل دے مطابق ’کریم‘ نے پاکستان بھر وچ اپنی بس سروس لانچ کرن دی منصوبہ بندی کرلئی اے۔ 30ملین رجسٹرڈ لوکاں دی حامل آن لائن ٹیکسی سروس’کریم‘ نے جتھے پاکستان دے کئی شہراں وچ اپنی سروس شروع کیتی اوتھے ہن’ کریم‘ ولوں لوکاں دی سہولت لئی کئی شہراں وچکار بس سروس شروع کرن بارے منصوبہ بندی کیتی جارہی اے۔
ایہ پراجیکٹ سبھ توں پہلاں مصر دے شہر قاہرہ وچ لانچ کیتا گیا سی ۔ ایس پائلٹ پراجیکٹ دی کامیابی مگروں متحدہ عرب امارات دی ایس کمپنی نے ایسے پراجیکٹ نوں لانچ کرن لئی پاکستان اُتے اکھاں رکھ لئیاں نیں۔ کریم دا مننا اے کہ پاکستان دے کئی شہریاں کول سوکھیاں سفری سہولتاں نہیں نیں۔ کریم دے چیف ایگزیکٹو افسر مدثر شیخ نے ایہ اعلان قاہرہ وچ ہون والی اک تقریب دوران کیتا۔ ایس موقعے اُتے مدثر شیخ قاہرہ سنے دنیا دے دوجے ملکاں وچ وی اپنی سروس شروع کرن اُتے خش وکھالی دتے ۔اوہناں نے آس ظاہر کیتی کہ چھیتی جنوبی ایشیا دے ہور ملکاں وچ وی سروس شروع کیتی جائے گی۔ اوہناں نے بس سروس دے کرایاں بارے گل بات کردے ہوئے آکھیا کہ بساں دا کرایہ گڈیاں دی نسبت 60توں 70فیصد گھٹ ہوئے گا۔
