ملتان(پاکستان پوائنٹ نیوز03۔دسمبر۔2018ء) محکمہ ریلوے وچ جتھے کرپشن دے خاتمے تے تبدیلی لیان دی گل ہو رہی اے اوتھے ریلوے دے اک سابق ملازم دا کروڑاں رُپئے دی جائیداد دا مالک ہون دا انکشاف ہویا اے۔ تفصیل دے مطابق ریلوے دا درجہ چہارم دا سابق ملازم جو محکمہ ریلوے وچ ریلوے الیکٹرک قلی دا کم کردا سی، کروڑاں رُپئے دی جائیداد دا مالک نکلیا۔ ریلوے دے سابق ملازم نے اپنی تعیناتی دوران محکمہ ریلوے دے کئی افسراں دی ملی بھگت نال تیل چوری، بجلی دے سامان وچ کرپشن تے لوکاں کولوں رشوت لے کے اپنی جائیداد بنائی۔
ایہو نہیں ایس ملازم اُتے ریلوے وچ بھرتیاں کروان دے الزام وی لائے گئے نیں۔میڈیا رپورٹ دے مطابق ریلوے دے ذکر کیتے گئے ملازم خلاف نیب ملتان نے ایف آئی اے نوں انکوائری کرن دی ہدایت کر دتی اے۔ ایس حوالے نال پرانا شجاع آباد فاروق پورہ دے رہائشی آصف رحمان نے درخاست وچ آکھیا کہ اشرف جو کہ ریلوے وچ درجہ چہارم دے تحت الیکٹرک قلی بھرتی ہویا تے الیکٹریشن دے عہدے توں (ر) ہویا نے بھرتی ہون مگروں سروس دوران متعلقہ افسراں نال رلکے کرپشن راہیں کروڑاں رُپئے دی جائیداد بنائی۔ نیب ملتان نے شہری دی درخاست سُنن مگروں ایف آئی اے نوں گھل دتی تے ایف آئی اے نوں انکوائری کرن دا حکم وی دتا۔
