اسلام آباد(پاکستان پوائنٹ نیوز03۔دسمبر۔2018ء) وفاقی وزیر اطلاعات دا آکھنا اے کہ کسے وی وزیر مشیر دے خلاف ریفرنس فائل ہوئے گا تے اوہ استعفا دیوے گا،آئینی ترمیم راہیں نیب دا اختیار ودھانا چاہنے آں، نیب لئی اپوزیشن ترامیم دیاں تجویزاں دیوے گی تے غور کراں گے۔ تفصیل دے مطابق وفاقی وزیر اطلاعات و نشریات فواد چودھری نے آکھیا اے کہ کسے وزیر مشیر دے خلاف ریفرنس فائل ہویا تے اوہ استعفا دیوے گا۔
اوہناں نے ہور آکھیا کہ اسیں آئینی ترمیم راہیں نیب دے اختیار ودھانا چاہنے آں۔ نیب لئی اپوزیشن ترامیم دی تجویز دیوے گی تے غور کراں گے۔اوہناں دا آکھنا سی کہ تحریک لبیک نال گل بات کامیاب ہو جاندی تے گرفتاریاں دی نوبت نہ آؤندی۔ معاشرے وچ بغاوت نہیں چلدی۔ اک انٹرویو وچ اوہناں نے آکھیا کہ کمیٹیاں نہ بنن دی وجہ (ن) لیگ اے۔ چیئرمین پبلک اکاؤنٹس کمیٹی لئی (ن) لیگ دا موقف غیر اخلاقی اے۔
اوہناں دا آکھنا سی کہ جدوں چالو حکومت ختم ہوئی تے ساڈے منصوبیاں دا آڈٹ کوئی ہور کرے۔ (ن) لیگ نوں چیئرمین پبلک اکاؤنٹس کمیٹی دے مطالبے توں پچھانہ ہٹنا چاہیدا۔ فواد چودھری نے آکھیا کہ آؤندے اجلاس تیکر پرویز خٹک کمیٹیاں دا معاملا حل کر لین گے۔ وزیر اطلاعات نے آکھیا کہ عمران خان آؤندے اسمبلی اجلاس وچ رلت کرن گے۔ جِنی ذمے واری حکومت دی اے اونی ای اپوزیشن دی وی اے۔ اپوزیشن طے کر کے آئی اے کہ پارلیمنٹ نہیں چلن دینی۔ اوہناں دا آکھنا سی کہ پارلیمنٹ وچ کسے معاملے نوں بحث توں نہیں روکیا جاسکدا۔
