اسلام آباد(پاکستان پوائنٹ نیوز03۔دسمبر۔2018ء) وفاقی وزیر ریلوے شیخ رشید دی سوشل میڈیا اُتے اک ویڈیو وائرل ہو ئی اے جیہدے وچ اوہناں نال دو سوانیاں نوں ویکھیا گیا۔ ایس ویڈیو دے سوشل میڈیا اُتے وائرل ہوندے ای ویڈیو وچ شیخ رشید نال موجود سوانیاں بارے سوال چُکے جا رہے نیں۔ ایس معاملے اُتے نجی ٹی وی چینل دے پروگرام وچ گل بات کردے ہوئے سینئر پرچا کار سمیع ابراہیم نے آکھیا کہ ایس ویڈیو وچ شیخ رشید نال دو سوانیاں نوں ویکھیا گیا ۔
ایس کمرے وچ شیخ رشید تے اوہناں نال دوسوانیاں توں وکھ ہور کوئی نہیں سی۔ سمیع ابراہیم نے آکھیا کہ شیخ رشید وفاقی وزیر نیں تے پاکستانی حکومت دی نمائندگی کردے نیں۔ میں شیخ رشید کولوں اک سوال کرنا چاہنا واں کہ تُسیں کتھے سی تے تہاڈے نال موجود ایہ دو نوجوان کُڑیاں کون سن؟ہوسکدا اے کہ دوناں نوجوان کُڑیاں تہاڈیاں قریبی رشتے دار ہون، میں تہاڈے اُتے الزام نہیں لا رہیا پر ایہ سوال سوشل میڈیا اُتے چُکیا جا رہیا اے۔
اوہناں نے آکھیا کہ پاکستان وچ اخلاقیات بہت اہم نیں۔ کوئی بندہ اپنی ذاتی زندگی وچ کیویں اے ایہ معنی رکھدا اے کیونکہ اوہ لوکائی دا نمائندہ اے۔سمیع ابراہیم نے آکھیا کہ جے ایس ویڈیو نوں ویکھیا جائے تے ایس ویڈیو وچ شیخ رشید بہت پریشان وکھالی دے رہے نیں کہ میری ویڈیو کیوں بنائی جا رہی اے جدوں کہ دوویں نوجوان کُڑیاں ویڈیو بنان تے تصویراں لین وچ رُجھیاں نیں۔
