لاہور(پاکستان پوائنٹ نیوز03۔دسمبر۔2018ء) وزیر اعظم عمران خان نے پچھلے مہینے حکومت دے پہلے 100دن پورے ہون اُتے حکومتی 100دناں دی کارکردگی نوں لوکائی ساہمنے رکھیا۔ ایس تقریب نال خطاب دوران وزیر اعظم عمران خان نے آکھیا کہ پِنڈاں وچوں غربت دے خاتمے لئی منصوبہ شروع کیتا جائے گا جیہدے تحت کُکڑیاں پالکے پاکستان وچوں غربت اُتے قابو پایا جائے گا۔
اوہناں نے آکھیاکہ پِنڈ وچ رہن والیاں سوانیاں نوں کُکڑیاں دے آنڈے تے چوچے دتے جان گے تے ایس منصوبے لئی بُہتے پیسیاں دی وی لوڑ نہیں اے۔ وزیر اعظم دے ایس بیان اُتے اوہناں نوں ڈاڈھی تنقید دا نشانہ بنایا گیا جدکہ اپوزیشن نے اوہناں نوں ’شیخ چلی‘تیکر آکھیا۔ ایس تنقید دے جواب وچ وزیر اعظم عمران خان نے مائیکرو بلاگنگ ویب سائٹ ٹویٹر اُتے مائیکرو سافٹ دے بانی بل گیٹس دی مثال دتی۔
مائیکرو بلاگنگ ویب سائٹ ٹویٹر اُتے اپنے پیغام وچ وزیراعظم عمران خان دا آکھنا سی کہ جدوں اسیں کُکڑیاں دی افزائش دی مدد نال ملکوں غربت مٹان دی گل کردے آں تے ساڈا مذاق اُڈایا جاندا اے پر دیسی کُکڑیاں پالن تے غربت مٹان بارے ایہو گل جے کوئی ’ولایتی‘ کرے تے اوہنوں سمجھدار آکھیا جاندا اے۔پر ہن پر صوبائی وزیر اطلاعات فیاض الحسن چوہان دا آکھنا اے کہ آنڈیاں بارے گلاں پِنڈ وچ رہن والے ای سمجھ سکدے نیں۔
گندے آنڈیاں نوں دیسی آنڈے والی گل سمجھ وچ نہیں آئے گی۔دوجے پاسے وزیر اعظم عمران خان دے ویژن دے مطابق پہلے مرحلے وچ لاہور وچ پنج کُکڑیاں تے اک کُکڑی دا یونٹ 1200رُپئے دے رعایتی ریٹ اُتے گھر گھر دین دا سلسلا شروع کر دتا گیا اے۔ یونٹ وچ گولڈن تے مصری نسل دیاں کُکڑیاں دتیاں جا رہیاں نیں۔محکمہ لائیو سٹاک دے مطابق کُکڑیاں تن ہفتیاں وچ آنڈے دین دے قابل ہو جان گیاں جیہدے نال روزگار وچ وادھا ہوئے گا۔
