علیمہ خان دے اثاثیاں دیاں تفصیلاں سپریم کورٹ وچ جمع

لاہور(پاکستان پوائنٹ نیوز01۔دسمبر۔2018ء) ایف بی آر حکام نے علیمہ خان دے اثاثیاں دیاں تفصیلاں سپریم کورٹ وچ جمع کروا دتیاں، رپورٹ وچ آکھیا گیا اے کہ علیمہ خان نے دبئی دے فلیٹ اُتے ایمنسٹی نہیں لئی، اپارٹمنٹ قرض دین مگروں ویچ دتا گیا۔ چیف جسٹس نے ہدایت کیتی کہ کارروائی نوں ریکارڈ دا حصہ بنایا جائے۔ تفصیل دے مطابق اج چیف جسٹس پاکستان میاں ثاقب نثار دی سربراہی وچ دو رکنی بنچ نے علیمہ خان دی باہرلے ملک موجود جائیداد دے معاملے اُتے کیس دی سنوائی کیتی۔

چیف جسٹس نے پُچھیا کہ علیمہ خان نوں طلبی لئی کدوں نوٹس گھلیا گیا تے ہن تیکر ایف بی آر نے کیہ کارروائی کیتی۔ ایف بی آر دے کمشنر ان لینڈ ریونیو ڈاکٹر اشتیاق نے دبئی دی جائیداد تے کرائے نامے بارے تفصیلی رپورٹ پیش کیتی تے دسیا کہ ایف بی آر نے 8فروری علیمہ خان نوں نوٹس گھلیا۔ باہرلے ملک ہون دی وجہ توں علیمہ خان نوں نوٹس نہیں ملیا۔ عدالتی ولوں پُچھن اُتے کمشنر نے دسیا کہ بنک کولوں قرض لے کے فلیٹ مُل لیا گیا تے کرائے راہیں قرض واپس کیتا گیا تے فیر ایہ ویچ دتا گیا۔

کمشنر ان لینڈ ریونیو نے واضح کیتا کہ باہرلے ملک جائیداد دی خریداری ظاہر کرنا لازمی اے۔ ایف بی آر نوں اوہناں دے نفعے تے نقصان نال کوئی غرض نہیں۔ایس موقعے تے چیف جسٹس نے درخاست اُتے ہور سنوائی 6دسمبر تیکر ملتوی کردے ہوئے ہور ریکارڈ منگ لیا۔