اسلام آباد(پاکستان پوائنٹ نیوز01۔دسمبر۔2018ء) بحریہ انکلیو دے خلاف گھلی گئی ٹیم نوں آپریشن توں پہلے ای واپس سد لیا گیا۔ میڈیا رپورٹس وچ دسیا گیا اے کہ آئی سی ٹی ولوں گھلی گئی کیپٹل ڈویلپمنٹ اتھارٹی دی ٹیم نوں بحریہ انکلیو توں اوس ویلے سد لیا گیا جدوں اوہناں نے 510کنال دی ریاستی زمین دی بحالی لئی آپریشن شروع نہیں کیتا سی۔بحریہ انکلیو نوں گھلے گئے نوٹس دی مدت 16نومبر نوں ختم ہون مگروں سی ڈی اے نے آپریشن لئی مکمل انتظامات کیتے سن پر جدوں ٹیم اوتھے اپڑی تے سینئر حکام ولوں اوہناں نوں واپس سد لیا گیا۔
سی ڈی اے چیئرمین افضل لطیف تے آئی سی ٹی انتظامیہ دے سینئر عہدیداراں نے ملاقات کیتی۔ ایہ ملاقات چیئرمین دے دفتر وچ ہوئی پر اجے ایس حوالے نال کوئی اعلان نہیں کیتا گیا۔یاد رہوے کہ سیشن کورٹ نے بحریہ ٹاؤن دی زمین اُتے آپریشن روکن دی درخاست رد کر دتی سی جیہدے مگروں سی ڈی اے نوں بحریہ ٹاؤن دی 510کنال 6مرلا سرکاری زمین چھڈوان دی اجازت مل گئی۔
