کُکڑیاں پالن دے بیان اُتے تنقید:وزیراعظم نے ناقداں نوں کرارا جواب دے دتا

کُکڑیاں پالن دے بیان اُتے تنقید:وزیراعظم نے ناقداں نوں کرارا جواب دے دتا

اسلام آباد(پاکستان پوائنٹ نیوز01۔دسمبر۔2018ء) وزیر اعظم عمران خان نے حکومت دے پہلے 100دن پورے ہون اُتے حکومتی 100دناں دی کارکردگی لوکائی ساہمنے رکھی۔ ایس تقریب نال خطاب دوران وزیر اعظم عمران خان نے آکھیا کہ پِنڈاں وچوں غربت دے خاتمے لئی منصوبہ شروع کیتا جائے گا جیہدے تحت کُکڑیاں پالکے پاکستان وچوں غربت اُتے قابو پایا جائے گا۔ اوہناں نے آکھیاکہ پِنڈ وچ رہن والیاں سوانیاں نوں کُکڑیاں دے آنڈے تے چوچے دتے جان گے تے ایس منصوبے لئی بُہتے پیسیاں دی وی لوڑ نہیں اے۔ وزیر اعظم دے ایس بیان اُتے اوہناں نوں ڈاڈھی تنقید دا نشانہ بنایا گیا جدکہ اپوزیشن نے اوہناں نوں ’شیخ چلی‘تیکر آکھیا۔ ایس تنقید دے جواب وچ وزیر اعظم عمران خان نے مائیکرو بلاگنگ ویب سائٹ ٹویٹر اُتے مائیکرو سافٹ دے بانی بل گیٹس دی مثال دے دتی۔ مائیکرو بلاگنگ ویب سائٹ ٹویٹر اُتے اپنے پیغام وچ وزیراعظم عمران خان دا آکھنا سی کہ جدوں اسیں کُکڑیاں دی افزائش دی مدد نال ملکوں غربت مٹان دی گل کردے آں تے ساڈا مذاق اُڈایا جاندا اے پر دیسی کُکڑیاں پالن تے غربت مٹان بارے ایہو گل جے کوئی ’ولایتی‘ کرے تے اوہنوں سمجھدار آکھیا جاندا اے۔

      


یاد رہوے کہ ایس توں پہلاں مائیکرو سافٹ دے بانی بل گیٹس نے وی ماڑے ملکاں وچوں غربت دے خاتمے لئی اک لکھ چوچیاں دا عطیہ دتا سی۔ بل گیٹس دا آکھنا سی کہ کسے ملکوں وچوں غربت دے خاتمے لئی پولٹری دا کاروبار سبھ توں آسان تے چھیتی نتیجے دین والا کاروبار اے۔