اسلام آباد(پاکستان پوائنٹ نیوز01۔دسمبر۔2018ء) کسے وی ملک نوں چلان لئی اوہدی معیشت دا مضبوط ہونا بہت اہم ہوندا اے پر پچھلے کُجھ دناں توں پاکستان دی ڈِگدی ہوئی معیشت تے رُپئے دی قدر وچ لگاتار کمی نے جتھے اک تشویش دی لہر پیدا کیتی اے اوتھے بے روزگار طبقے نوں وی بُری خبر سُنا دتی اے۔ تفصیل دے مطابق ملک وچ ڈالر دی ودھدی ہوئی قیمت، رُپئے دی قدر وچ لگاتار کمی تے ڈِگدی ہوئی ملکی معیشت دی وجہ توں روزگار دے موقعے ہور گھٹ ہون دا امکان پیدا ہو گیا اے۔
سٹیٹ بنک آف پاکستان نے اپنے بیان وچ بینچ مارک ریٹ نوں چالو مہینے ہور ودھان دا اشارہ دے دتا اے ، جیہدے مگروں ملک وچ روزگار دے موقعے گھٹ ہو جان گے جدکہ بے روزگار بندیاں دیاں اوکڑاں وچ وادھا ہوئے گا۔ سٹیٹ بنک نے ملکی معاشی صورتحال نوں مُکھ رکھدے ہوئے سود دی شرح 1فیصد ودھان دا اعلان وی کیتا اے۔ جے ایہدے اُتے عملدرآمد ہویا تے ایہدے نتیجے وچ کاروباری تے صنعتی ادارے دباء وچ آ جان گے۔ سٹیٹ بنک آف پاکستان دا ایہ ممکنہ فیصلا ملک بھر وچ افراط زر نوں کنٹرول کرن دی وجہ توں ہوئے گا۔ ایس نشانے نوں حاصل کرن لئی پالیسی ریٹ بدلیا جائے گا۔
