اسلام آباد(پاکستان پوائنٹ نیوز30۔نومبر۔2018ء) وزیراعظم عمران خان نے آکھیا اے کہ رُپئے دی قدر وچ کمی توں گھبران دی لوڑ نہیں،سویر توں فون وج رہیا اے کہ ڈالر مہنگا ہو گیا، ملک دا سبھ توں وڈا مسئلا کرنٹ اکاؤنٹ کسارا(خسارہ) اے، ایہ کُجھ دیر لئی مشکل ویلا اے، ڈالر دی قدر وچ کمی لئی سرمایہ کاری تے برآمدات نوں ودھانا پئے گا، اسیں اوہ کم کر رہے آں جیہدے نال ڈالر ہور ہیٹھاں نہیں جائے گا۔
اوہناں نے اج جے ڈبلیو فور لینڈ پلانٹ دی افتتاحی تقریب نال خطاب کردے ہوئے آکھیا کہ چین پاکستان وچ 900ملین ڈالر دی سرمایہ کاری کر رہیا اے۔ سرمایہ کاری نال نوجواناں نوں روز گار ملے گا۔ پاکستان وچ پہلی بار کار ڈمینو فیکچرنگ پلانٹ لگن لگا اے۔ ہن پاکستان وچ باقاعدہ پوری گڈی تیار ہوئے گی۔ چین نال مقامی سرمایہ کاراں دا خیرمقدم کردے آں۔ ایس جوائنٹ وینچر نال 45ہزار نوجواناں نوں نوکریاں ملن گیاں۔
پنج ہزار نوجواناں نوں پہلے نوکریاں دیواں گے۔ ایتھوں جدوں گڈیاں ایکسپورٹ کراں گے تے جدوں ساڈے لوک ہنر سکھن گے تے ہور سرمایہ کاری آئے گی۔ اوہناں نے آکھیا کہ سرمایہ کاراں لئی اسیں جِنا ماحول بہتر بناواں گے اونا بُہتا پیسا آئے گا۔ اوہناں نے آکھیا کہ ملک دا سبھ توں وڈا مسئلا کرنٹ اکاؤنٹ کسار ا اے۔ جدوں ملکی کسارا ودھدا اے تے کُجھ چِر لئی مشکل آؤندی اے۔ اسیں چین کولوں قرض لین دی بجائے ٹیکنالوجی دی منگ کیتی اے۔ وزیراعظم نے آکھیا کہ سویر توں فون وج رہیا اے کہ ڈالر مہنگا ہو گیا اے۔ ساڈی بدقسمتی سی کہ قرض مل جاندا تے اسیں سمجھدے کہ اسیں کامیاب ہوواں گے۔ اوہناں نے آکھیا کہ رُپئے دی قدر وچ کمی توں گھبران دی لوڑ نہیں اے۔ ڈالر دی کمی نال رُوپیہ ہیٹھاں گیا اے۔
