اسلام آباد(پاکستان پوائنٹ نیوز30۔نومبر۔2018ء) عمران خان نوں اسد عمر تے فواد چودھری مروان گے،اک شریف بندہ وزیر اعظم بن گیا اے، ایڈوائزر ٹھیک پاسے نہیں لیجا رہے، مینوں پتا اے کہ اوہناں نوں سینیٹ وچ کِنا ٹف ٹائم مل رہیا اے۔پاکستان پیپلز پارٹی دے رہنما نبیل گبول دا وزیر اعظم عمران خان دی تقریر اُتے تبصرہ کردے ہوئے آکھنا سی کہ لگدا اے کہ وزیر اعظم اجے تیکرکنٹینر توں لتھے نہیں۔
کٹے، جھینگے ایہ کوئی گل اے کرن والی؟عمران خان نے جو گلاں الیکشن توں پہلے لوکائی نوں اپنی ول کچھن لئی کیتیاں اوہ اجے اوہی گلاں کر رہے نیں۔نبیل گبول دا آکھنا سی کہ عمران خان نوں ایس طرحاں دیاں گلاں ہن نہیں کرنیاں چاہیدیاں۔ عمران خان نوں ایس گل دا اندازہ ہونا چاہیدا کہ اوہ کیہ بول رہے نیں۔ عمران خان نے جیہدے کولوں وی تقریر لکھوائی یاں فیر جس نے وی تقریر وچ ’کٹے‘ والا آپشن لکھ کے دتا اوہ اوہناں نوں صحیح پاسے نہیں لیجا رہے، جیہدے وچ وزیر اعظم عمران خان دے اکنامیکل ایڈوائزر شامل نیں۔
اوہناں دا آکھنا سی کہ وزیر اعظم عمران خان نے کوئی کارنامہ نہیں دسنا سی ،صرف ایہ دسنا سی کہ اوہناں نے کیہڑی سمت طے کیتی اے۔عمران خان نے ایف بی آر دیاں اصلاحات بارے وی کوئی گل نہیں کیتی۔اوہناں دا آکھنا سی کہ عمران خان نوں اسد عمر تے فواد چودھری مروان گے۔اک شریف بندہ وزیر اعظم بن گیا اے۔ مینوں پتا اے کہ اوہناں نوں سینیٹ وچ کِنا ٹف ٹائم مل رہیا اے۔
