اسلام آباد(پاکستان پوائنٹ نیوز30۔نومبر۔2018ء) حکومت نے پٹرول تے ڈیزل دی قیمت وچ دو، دو رُپئے فی لیٹر کمی دا اعلان کر دتا۔ مٹی دے تیل دی قیمت تن رُپئے تے لائٹ ڈیزل دی قیمت وچ 5رُپئے فی لیٹر کمی کیتی گئی اے۔ تفصیل دے مطابق وفاقی وزیر خزانہ اسد عمر نے اج پریس کانفرنس نال خطاب کردے ہوئے آکھیا کہ میں پٹرول تے ڈیزل دیاں قیمتاں بارے گل کرنا چاہنا واں۔
اوہناں نے دسیا کہ اکتوبر وچ عالمی منڈی وچ تیل دیاں قیمتاں اندر وادھاہویا سی۔ اکتوبر وچ ای عالمی سطح اُتے پٹرولیم وستاں دیاں قیمتاں ہور ودھیاں۔ اکتوبر وچ پٹرولیم وستاں وچ قیمتاں وچ عالمی سطح اُتے وادھا ہویا پر اسیں پٹرولیم وستاں دیاں قیمتاں وچ وادھا نہیں کیتا۔ اوہناں دا آکھنا سی کہ اسیں ڈیزل اُتے لیویز ڈیوٹی8رُپئے توں گھٹا کے 5.61رُپئے کیتی۔ (ن) لیگ دے دور وچ پٹرول اُتے 15فیصد ٹیکس سی۔ اوہناں نے آکھیا کہ نویں حکومت آئی تے اگست دے آخیر اُتے قیمتاں گھٹ ہوئیاں۔ ایس توں پہلاں مئی وچ پٹرول اُتے جی ایس ٹی 15فیصد توں گھٹ کر کے ساڈھے 4فیصد کیتا گیا سی۔ وفاقی وزیر خزانہ اسد عمر نے آکھیا کہ ہن نومبر وچ پٹرولیم پرائس انٹرنیشنل طور اُتے گھٹ ہونا شروع ہوئیاں۔
