وزیر اعظم عمران خان نے مجھاں ویچن پچھے لُکیا فلسفہ دس دتا

لوک سانوں مجھاں ویچن اُتے تنقید دا نشانہ بناندے نیں، مینوں رب کولوں ڈر لگدا اے اک پاسے لوکاں کول کھان نوں نہیں تے دوجے پاسے وزیراعظم ہاؤس وچ مجھاں پَل رہیاں نیں:وزیراعظم عمران خان

وزیر اعظم عمران خان نے مجھاں ویچن پچھے لُکیا فلسفہ دس دتا
لوک سانوں مجھاں ویچن اُتے تنقید دا نشانہ بناندے نیں، مینوں رب کولوں ڈر لگدا اے اک پاسے لوکاں کول کھان نوں نہیں تے دوجے پاسے وزیراعظم ہاؤس وچ مجھاں پَل رہیاں نیں:وزیراعظم عمران خان

اسلام آباد(پاکستان پوائنٹ نیوز29۔نومبر۔2018ء) لوک سانوں مجھاں ویچن اُتے تنقید دا نشانہ بناندے نیں، مینوں رب کولوں ڈر لگدا اے کہ اک پاسے لوکاں کول کھان نوں نہیں تے دوجے پاسے وزیراعظم ہاؤس وچ مجھاں پَل رہیاں نیں۔تفصیل دے مطابق اج حکومت ولوں 100دناں دی کارکردگی بارے تقریب دا جناح کنونشن سنٹر آہر کیتا گیا۔ تقریب دی شروعات وچ قومی ترانہ وجایا گیا۔

جیہدے مگروں فیصل جاوید نے سارے پروہنیاں نوں جی آیاں آکھیا گیا۔ تقریب دی شروعات تلاوت قرآن پاک توں ہوئی۔ جیہدے مگروں حکومت ولوں اک ویڈیو پیش کیتی گئی جیہدے وچ دسیا گیا کہ کس طرحاں حکومت نے مسائل دا حل لبھیا۔ تقریب وچ بانی پاکستان قائداعظم محمد علی جناح دی تقریر نوں خصوصی طور اُتے وکھایا گیا۔ جیہدے وچ اوہ آکھدے نیں کہ مسلمان مصیبت وچ گھبراندے نہیں۔

جدکہ ایہدے مگروں عمران خان دی تقریر وکھائی گئی جیہدے وچ وی اوہناں ایہو آکھیا کہ مسلمان مصیبت وچ گھبراندے نہیں۔ وزیر اعظم عمران خان نے 100دناں دی کارکردگی تقریب نال خطاب کردے ہوئے آکھیا کہ 22سال بعد اپوزیشن و چ رہ کے ہن دسنا پیندا اے کہ میں وزیر اعظم آں۔ایس موقعے تے وزیراعظم نے 100دناں دے پلان دا کریڈٹ بشری بی بی نوں دتا۔اوہناں نے آکھیا کہ میری گھر والی نے اوکھے ویلے وچ بہت ساتھ دتا۔

وزیراعظم نے آکھیا کہ میں بہت کُجھ سُنیا کہ 100دناں وچ ایہ نہیں ہویا، 100دناں وچ اوہ نہیں ہویا۔ پر میری نظر وچ 100دن ایہ نیں کہ جدوں اسیں نماز پڑھنے آں تے 5ویلے اسیں صرف رب کولوں سدھا راہ منگنے آں۔ کہ رب ساہنوں اوس راہ اُتے لا دے جتھے نیکاں نوں لایا۔ میں بار بار آکھنا واں کہ انسان دے ہتھ وچ کوشش ہوندی اے تے نیت ، تے کامیابی رب دیندا اے۔ اسیں 100دناں وچ اوہ کیتا جو مدینہ دی ریاست وچ سی۔ اسیں 100دناں وچ مدینہ دی ریاست وانگ کم کیتا۔وزیر اعظم دا آکھنا سی کہ لوک سانوں مجھاں ویچن اُتے تنقید دا نشانہ بناندے نیں پر مینوں رب کولوں ڈر لگدا اے اک پاسے لوکاں کول کھان نوں نہیں تے دوجے پاسے وزیراعظم ہاؤس وچ مجھاں پَل رہیاں نیں۔