اسلام آباد(پاکستان پوائنٹ نیوز29۔نومبر۔2018ء) خالصتان وی آزاد ہوئے گا تے کشمیر وی،آرمی چیف نال ملاقات کرن والے سکھ رہنما گوپال سنگھ چاولا نے بھارت دیاں نیندراں اُڈا دتیاں۔ایس حوالے نال نجی ٹی وی چینل دے پروگرام وچ گل بات کردے ہوئے سکھ رہنما گوپال سنگھ چاولا نے آکھیا کہ بھارتی میڈیا نے پاکستان آن تے آرمی چیف جنرل قمر جاوید باجوہ نال ملاقات کرن اُتے مینوں دہشت گرد آکھنا شروع کر دتا اے۔
اوہناں نے آکھیاکہ میں قمر جاوید باجوہ نال ملاقات کیتی۔ جے میں دہشت گرد آں تے پاکستانی آرمی چیف نے میرے نال ملاقات کیوں کیتی؟اوہناں نے آکھیا کہ میں نہ تے کسے اسرائیلی آرمی چیف نال ملیا آں نہ ای بھارتی آرمی چیف نال ، میں پاکستانی آرمی چیف جنرل قمر جاوید باجوہ نال ملاقات کیتی اے۔ چیف آف آرمی سٹاف جنرل قمر جاوید باجوہ ساڈے دلاں وچ رہندے نیں کیونکہ سکھ قوم دا پاکستان نال ایسا رشتہ اے جیویں مسلماناں دا سعودی عرب نال اے۔
جے پاکستان ترقی کردا اے تے سکھ قوم وی ترقی کردی اے۔ گوپال سنگھ چاولا نے آکھیا کہ سکھ تے مسلماناں دا آپس وچ اک ڈونگھا رشتہ اے۔ بابا گرونانک دی پیدائش جیہڑے ہتھاں وچ ہوئی سی اوہ مائی دولتاں سن، تے اوہ مسلمان سن۔ گورنانک صاحب دی روحانیت نوں جیہنے سبھ توں پہلے منیا اوہ وی مسلمان سن۔ گورونانک صاحب دے جو سبھ توں نیڑے سن اوہ وی مسلمان سن۔ گولڈن ٹیمپل دی نینہ حضرت میاں میر نے رکھی اوہ وی مسلمان سن۔
