واشنگٹن(پاکستان پوائنٹ نیوز29۔نومبر۔2018ء) امریکا نے پاکستان ولوں کرتارپور سرحد کھولن دا خیرمقدم کیتا اے۔ میڈیا رپورٹس دے مطابق پاکستان ولوں کرتارپور سرحد کھولن اُتے امریکی محکمہ خارجا نے ردعمل دا اظہار کرد ے ہوئے آکھیا اے کہ پاک بھارت رابطے ودھان دا خیرمقدم کردے آں۔ امریکی محکمہ خارجا دا آکھنا اے کہ پاک بھارت مذاکرات اعتماد سازی دے فروغ دی حوصلا افزائی کردے نیں۔
پاکستان تے بھارت دے بہتر تعلقات خطے لئی ضروری نیں۔ یاد رہوے کہ پچھلے دیہاڑے وزیراعظم عمران خان نے کرتارپور راہداری دا نینہ پتھر(سنگ بنیاد) رکھیا۔ایس موقعے اُتے اک خوبصورت تقریب دا وی آہر کیتا گیا ۔ تقریب وچ وزیر خارجا شاہ محمود قریشی، وزیر اعلا پنجاب عثمان بزدار وی موجود سن۔تقریب وچ بھارتی سرکاری وفدتے وزیر اعظم دے بیلی سدھو وی موجود سن۔
وزیراعظم دا تقریب نال خطاب کردے ہوئے آکھنا سی کہ اج ہر اکھ تے چہرے اُتے خشی ویکھ رہیا واں۔ تقریب دے سارے رلتیاں نوں جی آیاں نوں آکھنا واں۔ عمران خان دا آکھنا سی کہ میں زندگی دے 21سال کرکٹ کھیڈی تے فیر 22سال توں سیاست کر رہیا واں۔ میں کرکٹ کھیڈدے ہوئے دو طرحاں دے کھڈاریاں نال ملیا۔ اک اوہ کھڈاری سن جو میدان وچ پیر رکھد تے اوہناں ذہن اُتے ہارن دا خوف ہوندا سی تے فیر اوہ صرف کوشش کردے سن کہ اسیں میچ نہ ہاریے۔
پر اک دوجے کھڈاری سن جو کرکٹ دے میدان وچ پیر رکھدے ہوئے صرف جِتن دا سوچدا سن اوہناں اُتے ہارن دا خوف نہیں سی۔ کیونکہ اوہ رسک لیندے سن تے وڈے فیصلے کردے سن۔ عمران خان دا آکھنا سی کہ جو ہارن توں ڈرا اے اوہ کدی وڈا کھڈاری نہیں بنیا۔ ایسے طرحاں سیاست وچ وی دو طرحاں دے سیاست دان ویکھدے نیں اک اوہ جو صرف اپنے لئی سیاست کردے سن تے اپنا فائدہ ویکھدے سن۔
اپنے مفاد لئی لوکاں نوں قربان کردیندے سن اک اوہ سیاست دان سی جو وڈی سوچ لے کے آؤندے سن۔ اوہ نفرتاں کھلار کے ووٹ نہیں لیندے سن۔ اوہ اپنے خوف اُتے قابو پاکے بہت جرات مندانہ فیصلے کردے سن۔ اوہناں دا آکھنا سی کہ ہمیشہ وڈے خاب ویکھن والا سیاست دان ای کامیاب ہوندا ۔ وزیر اعظم عمران خان دا ہور آکھنا سی کہ بھارت تے پاکستان دے معاملے وچ دوناں پاسے غلطیاں ہوئیاں،جے اسیں ماضی دیاں زنجیراں نہ توڑیاں تے اسیں اگانہ نہیں ودھاں گے۔
بیتے ویلے توں سانوں سبق سکھنا چاہیدا اے۔ اوہناں دا آکھنا سی کہ جے فرانس تے جرمنی اک دوجے نال اگانہ ودھ سکدے نیں تے اسیں کیوں نہیں ودھ سکدے؟مینوں پہلے بھارت وچ آکھیا جاندا سی کہ پاکستان دی فوج پاک بھارت تعلقات بہتر نہیں ہون دیوے گی پر میں اج تہانوں لوکاں نوں دس دیواں کہ پاکستانی حکومت ، فوج تے سارے ادارے اک پیج اُتے نیں۔وزیر اعظم عمران خان دا آکھنا سی کہ میں بھارت نال دوستی کرنا چاہنا واں۔ ساڈے ملکاں وچ غربت اودوں ختم ہووے گی جدوں بارڈر کُھلن گے تے تجارت ہوئے گی۔
