لاہور(پاکستان پوائنٹ نیوز28۔نومبر۔2018ء) لاہور الیکٹرک سپلائی کمپنی(لیسکو) نے لاہور نوں لوڈشیڈنگ فری شہر بنان دا فیصلا کر لیا اے۔ تفصیل دے مطابق لیسکو نے صوبائی راجدھانی لاہور نوں لوڈشیڈنگ فری شہر بنان دا فیصلا کیتا اے۔ لاہور دے واسیاں نوں بجلی دی بار بار ٹرپنگ توں محفوظ بنان تے لوڈشیڈنگ توں بچان لئی شہروچ مختلف تھاواں اُتے 7نویں گرڈ سٹیشن بنان لئی ڈپٹی کمشنر لاہور صالح سعید کولوں 200کینال سرکاری زمین وی منگی گئی اے۔
ارباں رُپئے مالیت دی زمین لین لئی لیسکو حکام نے ڈپٹی کمشنر لاہور نوں باقاعدہ خط لکھ دتا اے۔ ایہ وی دسیا گیا اے کہ نویں گرڈ سٹیشن لاہور دے علاقے وسن پورہ، کالا کھتائی تے گلبرگ سنے ہور علاقیاں وچ لائے جان گے۔ خط وچ ذکر کیتے گئے علاقیاں وچ سرکاری زمین دین دی منگ کیتی گئی اے۔
